Sahararrei bidaltzeko bederatzi tona elikagai eta konpresa eman dituzte getxoztarrek
Getxo udalerriko Sahararen aldeko Atfal elkarteak, bederatzi tona elikagai eta konpresa batu ditu Aljeriako errefuxiatuen kanpamentuetara bidaltzeko, Getxoko Udala, ikastetxe eta Lantegi Batuak bezalako beste erakunde batzuen laguntzarekin; iaz bildutakoaren bikoitza hain zuzen. Fronte Polisarioak EAEn duen ordezkaritzak eskatutakoari jarraituz burutu dute berriro Sahararen Aldeko III. Euskal Karabana. Ekimena Saharar Herriarekiko Elkartasunerako Euskal Elkarteek antolatu dute, “Bakea Saharan” Euskal Legebiltzarreko talde-artekoa eta Euskal Fondoaren Sahararako Koordinazio Unitatearen laguntzarekin. "Elkartasun kanpaina honen helburu nagusia janaria helaraztea da, ahal den neurrian, Tindoufeko (Aljeria) saharar errefuxiatuak jaki aldetik pairatzen ari diren krisialdia nolabait arintzeko", azaldu dute. Berriro ere "Piztu itxaropena" leloari helduz, otsailaren 17an abiatuko da Donostiatik karabana eta, oraingoan, azukrea, dilistak, atuna eta konpresak eramango ditu. Argazkian, elikagaiak eramateko Euskal Karabanak erabiltzen duen kamioietako bat.
Bai Imanol Landa Garapenerako Lankidetza zinegotziak, bai Julio San Roman Atfal elkarteko ordezkariak gaurko prentsaurrekoan nabarmendu dutenez, “gizarte eragileek eta getxoztarrek emandako erantzuna aparta izan da beste behin, behar handiak dituztenekin, herri saharrarekin kasu, elkartasuna eta konpromisoa erakutsi dutelako”. Getxoko Udalak bere aldetik, 18.000 euroko laguntza ematea erabaki du. Diru horrekin atoia duen kamioi bat (garraio gastuak barne) erosiko dute materialea garraiatzeko, Landak jakinarazi duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun