Antzerki eskaintzari dagokionez, Luna Llena taldeak "Tejas verdes" lana aurkeztuko du. Istorio hau Txilen girotuta dago, Pinocheten garaian, eta, zenbait lekukoren adierazpenen bidez, egoera berdinaren ikuspuntu ezberdinak erakusten ditu. Antzezlan hau Besarkadaren (Emakumeen Antzerki Taldeen Federazioa) Emakumeak Eszenan zikloaren barruan dago. Ekimen horrek emakumearekin uztarturiko zenbait gai eta arazotan sakontzen du.
Larunbatean estreinaldia
Simulacro antzerki talde getxoztarrak bere azken lana estreinatuko du: "Graffiti de amor politico-social". Lan honek ikuslea pentsamendu politiko bakarreko ingurura eramango du, elkar ezagutzen ez duten gizon eta emakume bat graffitien bidez maitemindu egingo diren tokira, kultur iturriek azaldu dutenez. Bikote hori gai izango al da elkar maitatzen jarraitzeko aldaketa datorrenean eta pentsamendu anitza iristen denean? Honako hau zalantzan jartzen du lanak, hain zuzen ere. Testuak errealismo magikoa eta sinbolismoa, gorputz adierazpena eta eszenografia konbinatzen ditu. Azken horren ardatza etengabe horman dagoen graffitia da, modu horretan jendearen interakzioa bilatzeko.
Antzerkiak eta Gazta Azokak osatzen dute Getxoko Kultur Etxeak asteburu honetarako prestatu duen eskaintza. Ostiral honetan, otsailak 9, Emakumeak Eszenan zikloaren beste antzezlan bat izango da Getxo Antzokian, 19:30ean: "Tejas verdes", Luna Llena taldearen eskutik. Bihar ere III. Gazta Azoka zabalduko dute. Igandera arte, 12 saltoki izango dira Telletxe plazan. Bertan bisitariek hainbat mota eta jatorritako gaztak dastatu eta erosteko aukera izango dute: ore biguneko gaztatik Idiazabal gaztara, ahuntz-gazta, ardi-gazta, titi-gazta, Erronkari gazta edota gazta urdina ahaztu gabe. Ferian jatorri oso ezberdinetako ekoizleek parte hartuko dute. Hiru egunetan zehar, Euskal Herriko txoko ezberdinetatik etorritakoez gain, Caceres, Galizia, Asturias, Kantabria, Segovia eta Burgosko ekoizleek euren produktuak eskainiko dizkiote publikoari honako ordutegian: goizez, 11:00etatik 14:30era eta, arratsaldez, 17:00etatik 21:30era. Azkenik, larunbatean, hilak 10, Simulacro antzerki talde getxoztarrak bere azken lana estreinatuko du Algortako antzokian, 20:00etatik aurrera: "Graffiti de amor politico-social". Argazkian, hainbat lagunek Algortako azokan gazta dastatzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun