"Gu ta gutarrak" bertso ikuskizuna ekarriko du igandean Algortara Korrika Kulturalak
Korrika 15 laster dugula aditzera emateko, ikus-entzunezko, bertsolaritza, literatuta, musika eta haurrentzako saio mordoa antolatu ditu aurten ere Alfabetatze Euskalduntze Koordinakundeak (AEK). Horrenbestez, euskararen alde lasterka egiteko "giharrak berotzeko" asmoz, "Gu ta gutarrak" ikuskizuna ekarriko du Algortara, igande honetan, otsailak 11, Korrika Kulturalak. Ekitaldia 18:00etan izango da Getxo Antzokian eta sarrerak bertan jarriko dituzte salgai 8 eurotan. Hala ere, eguerdi aldean hasita eta arratsaldeko emanaldira arte egongo da zerekin gozatu San Nikolas plazan, Korrikaren aurtengo edizioan estreinatu duten Kulturbiraren baitan. Kamioitzar batetik ateratako eszenatokian, ipuin kontalariak, animazioa eta musika izango dira; baita neska-mutikoek petoak marraztu egin ahal izateko tailerra eta txalaparta emanaldia eta ikastaroa Uribe Kostako Txalaparta Ekimenetarako Sustapen Taldearen (UKTEST) eskutik. Argazkian, "Gu ta gutarrak" ikuskizunaren irudietako bat.
Getxoko Udaleko Euskara Zerbitzuaren laguntzaz antolatuta, Igor Elortza eta Unai Iturriaga bertsolariek eta Josu Zabala, Aitor Rubio eta Alex Ruiz de Azua musikariek 90 minutuko iraupena duen ikuskizuna eskainiko dute. Bertsoak eta musika ditu oinarri, emanaldian hamar-hamaika bertso sorta musikatuta eta bat-bateko bertso batzuk ere kantatuko baitituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun