Joxe Arregi Guardia Zibilak atxilotu zuen Madrilen 1981eko otsailaren 4an, eta bederatzi egun geroago, otsailaren 13an, hilik amaitu zuen Carabanchel espetxeko madrildarreko ospitalean. Astearte honetan betetzen dira 26 urte gertaera hartatik, eta Torturaren Aurkako Eguna izanik, mobilizazioak izango dira Euskal Herriko hainbat txokotan, "torturatu guztiak gogoan izan eta tortura desagerpena exijitzeko". Uribe Kosta eskualdeari dagokionez, besteak beste Algortan, Telletxe plazan deitu dute mobilizazioa, 20:00etan. Etzi ere ordu eta toki berean da hitzordua, Iñaki de Juana Chaosek gose greban 100 egun betetzen baititu asteazken honetan. Bitartean, preso politiko donostiarraren zigorra hiru urtera murriztu du Espainiako Auzitegi Gorenak. Argazkian, hedabideek azken egunotan kaleratutako irudiek agerian uzten dute De Juanaren egoeraren larritasuna / Etengabe.
Uribe Kostako Amnistiaren Aldeko Mugimenduak Etengabe bitakoraren bitartez salatu duenez, "Torturatuak eta torturaz hildakoak ugari izan dira Euskal Herrian, eta orain ere sistematikoki torturatu egiten dituzte atxilotuak, bai Espainiako poliziek zein EAEkoak ere. Egia da Ertzaintzak metodoz aldatu eta orain batez ere ADN 'erabili' egiten duela nahi dituenak espetxeratzeko, baina egia da ere Ertzaintzak egindako torturaz baliatuta gazte ugari dagoela gaur egun espetxean". Eskualdera etorrita adibidetzat jarri du errepresioaren aurkako erakundeak Orkatz Gallastegi berangoztarraren kasua, "Ertzaintzaren jokabide politiko anker hori begi bistan ikusteko". "Torturaz soilik oinarritutako sumarioen ondorioz" espetxean zigor osoak betetzen ari direnak ere badaudela gogoratu dute: Gallastegi bera, Albaro Arri, Jabier Gallaga…
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun