Hirugarrenean bai. Bi deialdiren ostean, azkenean atzo egin zen Oxbow Punta Galea Big Challenge txapelketa. Eta zelan gainera: antolatzaileek surf denboraldiaren "ikusgarrienatzat" jo dute igandeko saioa. Hala ere, 1.700 euroko sari potoloa batentzat izan zitekeen bakarrik eta, horrenbestez, Jaime Fernandez getxoztarrak hartu zuen olaturik handiena. Etxekoak irabazle, beraz. Beste sari batzuk ere izan ziren: wipe out edo zartakorik handiena (600 euro) Iñigo Idigoras zarauztarrak irabazi zuen, jaitsierarik ikusgarriena (900 euro) Pablo Garciak, Zarautzekoa ere bai; eta surflaririk osatuena (1.200 euro) Pablo Solar kantabriarra izan zen. Sari banaketa Getxoko kirol portuan egin zen, giro ederrean, ehunaka lagunen artean. Argazkian, olatu ikusgarriak izan ziren atzokoan / EHSF.
Goizeko 11:30ean bildu ziren surflariak eta antolatzaileak itsasoaren baldintzak aztertzeko asmoz. Olatuak iraunkorrak ziren, lau metrotik gorakoak, beharrezko gutxienekoa. Posible zen, beraz, txapelketa egitea eta ikusgarria izango zela ematen zuen. Bada, 12:30ean ekitaldirako pestatutako itsasontzia atera zen Getxoko kirol portutik. Bertan, antolatzaileak, kazetariak, argazkilariak eta kamara operadoreak zihoazen. Handik minutu gutxira sekulako izualdia hartu zuten, lekukoek baieztatu dutenez: olatu erraldoi batek, gainetik salto egin eta ia-ia buelta eman zuen ontziak; "ikara eta egoneza ikaragarria pairatu zuten guztiek", Euskal Herriko Surf Federazioko kideek euren webgunean aitortu dutenez. Egoera ez zen hobeagoa uretan. Lan handia izan zuten surfariek olatuen gainean zutik egoten. Baina itsaslabarretan ziren lagunak ikuskizun ederraz gozatzen ari ziren. Besteak beste, Iker Fuentes getxoztarrak, haitzen artetik atera behar izan zen, itsaskiak bultzatuta eta apar artean. Iker Acerok, berriz, ohola galdu eta Jaime Azpirozek birritan apurtu zuen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun