Borja Cobeaga eta Nacho Vigalondo zinemagileek hitzaldia emango dute bihar Leioako campusean
Borja Cobeaga eta Nacho Vigalondoren hitzaldiarekin emango zaio hasiera asteazken honetan, otsailak 14, EHUko Erandio eta Leioako campusean, Zinegile Gazteak zikloari. Biak ala biak Gizarte eta Komunikazio Zientzien Fakultateko ikasle izan ziren eta aurten Oskar sarietarako hautatuak izan dira, film laburren sailean, "Eramos pocos" izeneko lanagatik. Orain "Los cronocrimenes" bere lehenengo film luzea bukatzen ari da Vigalondo. Lan horren irudiak aurkeztuko dira, estrainakoz, biharko hitzaldian. Horretaz gain, zinemaren esparruan duten eskarmentuari buruz arituko dira biak. Aipatu fakultateko gradu aretoan izango da saioa, 12:00etatik aurrera. Argazkian, "Eramos pocos" film laburraren irudi bat.
Borja Cobeagak (Donostia, 1977) Ikusentzunezko Komunikazioa ikasketak bukatu zituen 1999an eta, beraz, titulazio horren lehenengo promozioko kide da. Zenbait film labur egin ditu: "Cupido es aspero", "La primera vez", sari ugari lortu eta Goya sarietan ere hautatua izan zena; eta "Éramos pocos", Espainiako eta nazioarteko 60 sari baino gehiago irabazi eta Oskarretarako hautatua izan dena. Horiek banatzeko ekitaldia hilaren 25ean izango da. Bestalde, Nacho Vigalondo (Cabezón de la Sal, Kantabria, 1977), 2005an ere izan zen Oskarretan izendatua Javier, Esteban, Jose Miguel eta Santiago Ibarretxe anai getxoztarrekin ekoiztutako "7.35 de la mañana" filmagatik. Hala ere, orduan ez zuten saririk etxera ekarri.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun