Getxon eraikitzeko egitasmoan "hirigintza iruzurraren zantzuak" daudela salatu dute Berdeek
Getxon 8.368 etxebizitza eraikitzeko Hirigintza-Antolamendurako Plan Orokorrean (HAPO) egin nahi duten aldaketaren aurka azaldu dira Berdeak, aipatu egitasmoak "ingurumenari kalte izugarria egiteaz gain, etxebizitzaren arazoaren konponbidea izango denik ez duelako ziurtatzen". Prentsa ohar bidez adierazi dutenez, "udalerriko berdeguneak osorik desagertaraziko dituzte, baina azken baserri-gunea suntsitu ere, Getxoko historia eta kulturaren zati garrantzitsua ezabatuz". Iñaki Urkiza Etxebizitza zinegotziak aipatzen duen "gizarte ekintza handia" hutsik dauden etxebizitzak zerrendatu eta horiek arrazoizko prezioan saldu edo alokatzea ahalbidetzea izango litzateke Berdeen ustez. "Hori egin eta gero, babes ofizialeko etxebizitzak behar balira, eraikiko lirateke, baina gradualki eta beharrizanen arabera", gaineratu du talde ekologistak. Getxon eraikitzeko egitasmoaren atzean EAEn parekorik ez duen "hirigintza iruzurraren zantzuak" badaudela salatu dute. Argazkian, Andra Mari auzo elkarteak deituta urtarrilaren 28an egin zen manifestazioa.
Gainera, aipatu zonaldea metrotik urrun geratzen denez, ibilgailu partikularrak oraindik gehiago erabiliko direla eta, ondorioz, Avanzadako errepidea kolapsatu egingo dela uste dute. Ingurumenaren gainekoei edo auzotarrenei baino, "enpresa eraikitzaileek interesei arreta" jartzea egotzi diote Getxoko Udalari Berdeek. Hori dela eta, "gardentasun handiagoz eta herritarrek parte hartuz" proiektua berraztertzea eskatu dute, "emaitzak justuagoak eta jasangarriagoak" izan daitezen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun