Leioako campuseko Zientzia Parkearen planifikazioan parte hartuko du Bizkaiko Teknologi Parkeak
Otsailaren 12an sinatu zituzten Juan Ignacio Perez Euskal Herriko Unibertsitateko errektoreak eta Julian Sanchez Bizkaiko Teknologi Parkeko lehendakariak, EHUk Leioan dituen lurretan eraikiko den Zientzia Parkearen diseinu eta planifikazioan parte hartzeko lankidetza hitzarmenak: bata oinarrizkoa eta bestea zehatza. "Hitzarmen bi horiek lanbide-prestakuntza handiko enplegua sortzeko jarduera ekonomiko eta sozial berriak sortu eta garatzeko estrategia sustatzea dute helburu", adierazi dute unibertsitateko iturriek. EHUko Gobernu Kontseiluak, 2005eko abenduaren 22an onartu zuen campusak garatzeko 2005/2010 plana: Bizkaian, zientzia parke bat sortzea zehazten da, "jakintza gizarteari helarazteko eta gizartearen garapen ekonomikoan parte hartzeko". Bizkaiko Foru Aldundiak eta Eusko Jaurlaritzak babestuta dago aipatu egitasmoa. Argazkian, Sanchez eta Perez hitzarmenak sinatzen.
Oinarrizko lankidetza hitzarmen horren mugarri garrantzitsuenak honako hauek dira: alde batetik, EHUko Zientzia Parkearen Master Plana idaztea eta, proiektuaren hedakuntza sustatzeko jardunaldiak antolatuz hori zabaltzea, lankidetza esparru egonkor bat sortu eta sinergiak bateratzeko. Eta bestetik, EHUko Zientzia Parkea Euskadiko Teknologi Parkeen Sarean sartzea. Lankidetza hitzarmen zehatzak, berriz, Zientzia Parkea sortzeko proiektuan elkarlanean aritzea du helburu. Master Plana idaztea eta plan horren egikaritze zuzendaritza Bizkaiko Teknologi Parkearen erantzukizuna izango da, EHUren premien arabera, unibertsitateko iturrien arabera. Proiektuak honako hauek gauzatzea eskatuko du: plan estrategikoa, antolakuntzakoa, gestiokoa, antolamendukoa eta negozio plana. Hitzarmen honek Bizkaiko Campusean eraikiko den Zientzia Parkeko proiektua egin arteko iraupena izango du hasiera batean, zazpi bat hilabetekoa hain zuzen. Epe hau bukatutakoan, eskumena duten herri-administrazioei aurkeztu beharko zaie abian jartzeko. Zientzia Parkea Erandio eta Leioako campusaren aurrean dauden lurretan eraikiko da eta gutxi gora behera 85.000 metro koadroko azalera izango du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun