Miren Dobaran Berangoko alkateak, Jose Luis Bilbao ahaldun nagusiak eta Eusebio Melero Herri Lan eta Garraio diputatuak otsailaren 16an zabaldu zuten Sopela eta Berango lotzen dituen errepide berria. Dobaranek azaldutakoaren arabera, “proiektua gaur egun kudeatu gabe dagoen zonalde honetako kale bat egitearen aurrerapena da. Etorkizunean kale hau herriko kale-izendegira batuko da”. Udalak kale horren egokitzapena aurreratzea erabaki du “Berango eta Sopela arteko bide-komunikazioa hobetzeko, bi herrietako biztanleei barruko komunikazio aukera bat eskainiz". Orain, herritarrak ez dira Uribe Kostako korridoretik nahitaez pasatu beharko”, adierazi zuen udal agintariak. Dobaranek esan zuenez, “bi herriak lotzen dituen bide honen zabaltzea oso ona iruditzen zaigu, honekin komunikazio zirkuitu ezin hobea lortuko dugu bi herrien artean, herritarrentzat oso erosoa izango dena eta Berangoko industrialdeari aukera berriak eskainiko dizkiona”.
Ezaugarriak
Errepide berriak 400 metroko luzeera du eta Berangoko Arabeta auzoa eta Uribe Kostako korridoreko sarbidea, Urko zonaldean (Sopela), lotzen ditu. Lanek 1.300.000 euroko gastua ekarri dute. Horiek ordaintzeko, 200.000 euro jarri ditu Aldundiak eta gainontzekoa Berangoko Udalark. “Berangoko eta Sopelako biztanleen onurarako inbertsio ona dela uste dugu”, amaitu zuen Dobaranek.
Joan den ostiralean zabaldu zuten Uribe Kostako korridorea eta Berango lotzeko errepidea "berandu" datorrela kritikatu du Koldo Martinez EB-Berdeen zinegotzi berangoztarrak. Hain zuzen ere, Bizkaiko Foru Aldundia eta Berangoko Udalaren artean "erabateko koordinazio eza" egon dela eta tokiko erakundeak "utzikeriaz" jokatu duela salatu zuen inaugurazioaren egun berean Ezker Batuko ordezkariak. "Berango eta Sopela arteko errepidea urte betez moztuta eduki ostean, Jose Luis Bilbao ahaldun nagusia eta Miren Dobaran Berangoko alkatea datozkigu orain azpiegitura berriarekin poz-pozik, auzotarrei eragozpenak baino ez dizkienean eragin, Sopelara joateko Getxora buelta egin behar zutelako", kexatu zen Martinez. Argazkian, Larrabasterratik Berangorainoko bidea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun