Iker Gallastegi Irantzu Gallastegi preso politiko berangoztarraren osaba gaurko deitu du Juan Del Olmo epaileak Espainiako Auzitegi Nazionalean bere aurka abiatutako sumarioan deklaratzera. Auzia iazko uztailean zabaldu zen, Teresa Palacios Espainiako Auzitegi Nazionaleko 3. aretoko epaileak España y Libertad (Espainia Ta Askatasuna, ETA) plataformak Iker Gallastegiren aurka ezarritako salaketaren ondorioz. Falange Vascako diruzain ohia eta Minuto Digital-eko kazetaria den Yolanda Couceiro Morinek koordinatzen duen plataformak Tele 5 kateak Miguel Angel Blancori buruz 2006ko uztailaren 12an emandako erreportajean Iker Gallastegik egindako adierazpenak salatu zituen. Gallastegik honakoa adierazi zuen: “zergatik eskatu behar dugu barkamena? Guri nork eskatu digu barkamena frankismoaren 40 urteak direla eta? ETAn ez dago hiltzea gustatzen zaien horietakorik, ez dago. Haien egitekoa da, aberriaren betebeharra delako hiltzen dute”. España y Libertaden esanetan “terrorismoaren goratzea” egin zuen Gallastegik. 2006ko urriaren 31n, Ermuako Foroak “begibistako delitu baten aurrean Fiskaltzak inolako ekimenik abiatu” ez zuenez auzian bertaratu zen, Gallastegiren aurkako salaketa herritarra izateko asmoz. Uribe Kostako Amnistiaren Aldeko Mugimenduak elkartasuna adierazi zion Iker Gallastegiri. Argazkian, Juan del Olmo epailea, orain dela lau urte “Euskaldunon Egunkaria” itxi zuena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun