Itzubaltzetako eragileek kaleratutako manifestua:
Antolatzea ez da delitua, Itzubaltzetako gazteria aurrera!
Itzubaltzetako Segik, herriko beste eragileekin batera burutzen duen lana guztiz zilegia da. Era berean , jarduera politiko natural bera izaten jarraituko dugu Segirekin, orain arte bezala, aurrerantzean ere bai.
- Espainiako Auzitegi Gorenak eta Espainiako Estatuak ezarri duten sententzia arbuiatzen dugu, Segi erakunde terrorista izendatzen duena, alegia.
- Segiren aurkako erasoa, gazeriaren aurkakoa ere bada. Beste hainbat eragile bezala, antolatutako erakundea delako, eta finean, antolakuntzarako eskubidea izan delako zigortua.
- Beste edozein borroka bezala, Segirena ere guztiz zilegia da.
- Gatazka honen konponbidea ez daiteke errepresioan oinarritu, eta gure babesa luzatzen diegu gartzeleratu eta errepresaliatuei.
- Ez diogu zilegitasunik ematen ez sistema judizialari, ez indar polizialei, ez komunikabideei, ez espetxe sistemari, ez eta horiek babestu edota isiltasunaren bidez onartzen dituzten alderdi politikoei.
- Gazteriaren aurkako eraso bakoitzari aurre egiteko konpromisoa hartzen dugu.
- Itzubaltzetako erakunde eta eragileok, gure ideien alde lanean jarraitzeko borondatea berresten dugu, edozein eraso gertatzen dela ere.
Gora Itzubaltzetako gazteria!
Ez Jaun Ez Jabe, Erromoko HNT, Itzubaltzeta gaztetxea, IA eta Itzubaltzetako Segi
Segiren "zilegitasuna" aldarrikatu eta biharko kontzentrazioa deitu dute Itzubaltzetako hainbat gazte eragilek
Itzubaltzeta / Erromoko hainbat gazte eragilek Jarrai, Haika eta Segi erakundeen aurkako ebazpena salatzeko agiria plazaratu dute. Aurrera begira, "gazteriaren aurkako eraso orori elkarrekin aurre egiteko borondatea" agertu eta, "proiektu politiko guztiak egingarriak izan behar direlako", aurrerantzean bide horri ekingo diotela iragarri dute. Horrenbestez, ostiral honetan, otsailak 23, Santa Eugenia plazan 19:00etan egingo den kontzentrazioan parte hartzera deitu dituzte herritarrak Ez Jaun Ez Jabek, Erromoko HNTk, Itzubaltzeta gaztetxeak, IAk eta Itzubaltzetako Segik. "Proiektu politiko guztiak defendagarriak diren markoa lortzea guztion esku dago", euren hitzetan. Argazkian, sententziaren aurka Itzubaltzetan egindako manifestazio bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun