Iñaki de Juanaren aldeko mozioa aurkeztu eta biharko lanuzte eta mobilizazioetan parte hartzera deitu du Getxo Biziak
Getxoko Udalak Iñaki de Juana Chaos preso donostiarraren askatasuna eska dezan, mozioa aurkeztu dute ostiral honetako (otsailak 23) udalbatzarrerako Getxo Bizia ezker abertzaleko herri plataformak eta Etxeratek. Euren ustez, "ezarri dioten aparteko zigorra gose greba latzaren bitartez nabarmen murriztea lortu duen arren, bi iritzi artikulu idatzi izanaren aitzakipean dute preso". Horrenbestez, goizeko 10etatik aurrera udaletxera hurbiltzera "gonbidatu" dituzte herritarrak bi eragileek. Aldi berean, Etxeratek hilabeteko azken ostiral honetarako deitu duen ordu beteko (12:00etatik 13:00etara) lanuzte zein mobilizazioetan parte hartzera deitu du Getxo Biziak. Besteak beste, Algorta (Telletxe plaza) eta Itzubaltzeta / Erromon (Xake plaza), 20:00etan izango dira elkarretaratzeak. Argazkian, Algortan pasa den abenduaren 29an hainbat solidariok Iñaki de Juanaren askapena aldarrikatzeko egindako ekimena.
Uribe Kostako gainontzeko udalerriei dagokienez, 19:30ean, Armintzan, bus geltokiaren aurrean eta Astrabuduan, Josu Murueta plazan egingo dute kontzentrazioa; eta ordu erdi beranduago, 20:00etan, Erandion, metro aurrean; Leioan, Boulevardean; Berangon, Gudari enparantzan; Sopelan, udaletxe aurrean eta Urdulizen, BBVAren aurrean. Goizean ere, 11:15ean kontzentrazioa egingo dute Itzubaltzetako Romo-Artatza institutuaren aurrean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun