Getxo Biziak eta Etxeratek gaurko udalbatzarrean aurkeztutako mozioari dagokionez, Iñaki de Juanari ezarritako sententzia berria ez zaiela "ondo iruditzen" erantzun dio Josu Amezaga ezker abertzaleko herri plataformako ordezkariari Iñaki Zarraoak. Halabaina, preso donostiarraren oraingo jarrerarekin ez datozela bat zehaztu du udal agintariak. "Bere garaian salatu genuen Iñaki de Juanaren egoera, zigorra ikaragarria iruditu zitzaigulako, baina egoera aldatu da. Orain ere ez zaigu ondo iruditzen, baina gero bakoitzak bere estrategia jarraitzen du. Guk ez dugu zertan bat egin behar De Juanaren, Euskal Preso Politikoen Kolektiboaren (EPPK), zuon (Getxo Biziari buruz) edota ETAren estrategiarekin", azaldu du Zarraoak. Bestalde, biolentziaren gaitzespena gora eta behera, "nork eta zer gaitzesten duen" eztabaidatzeko prest agertu da Getxo Bizia, "baldin eta behingoz hitza ematen bazaigu". Horri erantzunez, "gatazkaren ondorio dela argudiatuz" gaitzetsi beharra ekiditzea egotzi die ezker abertzaleko kideei alkateak.
Senideei laguntzak
Presoei bisitan joateko Getxoko Udalak diru laguntzak noiz emango dituen ere galdetu dio Zarraoari Amezagak. "Presoen senideei banatu beharreko 2005eko laguntzak ez dira oraindik heldu. Hori gutxi balitz, 2006an ez da ezta deialdia ere egin eta dagoeneko 2007ko otsailaren bukaeran gaude". "Martxan jartzen duguna bete egiten dugu eta hau ere bete egingo dugu", bota dio atzera Zarraoak. "Halere, badirudi diru hori ez dutela behar, zeren guri eskatu bai, baina Eusko Jaurlaritzari ez diote eskatzen", aurpegiratu dio Amezagari alkateak.
Baltasar Garzon Espainiako Auzitegi Nazionaleko epaileak debekatu egin du biharko, Bilbon, "Autodeterminazioa eta amnistia" lelopean antolatutako manifestazioa, deitzaileek Askatasuna legez kanpoko erakundearekin lotura dutelakoan. Garzonek Eusko Jaurlaritzako Herrizaingo Sailari bidali dio debekuaren agindua. Euskal Preso Politikoen Kolektiboak (EPPK) "borrokaldia" hasi zuen otsailaren 5ean, amnistia eta autodeterminazioa eskatzeko. Horren barruan, biharko manifestazio nazionalera deitu zituen herritarrak. Deialdi horrekin bat eginez eta, amnistiaren eta autodeterminazioaren aldarria bere eginez, agiria kaleratu zuten duela egun batzuk hainbat idazle (Laura Mintegi algortarra tartean), musikari, bertsolari, kirolari, kazetari eta bestek. LABek, Segik, EHAK-k, Udalbiltzak, Etxeratek eta EHEk ere bat egin dute. Bestalde, ehunaka lagunek egin dute gaur, Uribe Kosta eskualdean, Etxeratek deitutako ordu beteko lanuztea: besteak beste, 88 lagun kontzentratu dira Algortako Telletxe plazan eta 120 bat Leioako Boulevardean, bertan LAB eta ELA sindikatuetako kide ezagunak zeudela. Ondoren kalejira egin dute Tigre plazatik igaro eta Euskal Etxeen plazan amaituz. Argazkian, Algortako elkarretaratzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun