Udalbatzar aretoan egiten ari diren itxialdiaren bitartez, Gobernu Taldeari osoko bilkuretan hitza hartzeko ala ez duen eskubidea kendu nahi izatea leporatu dio Getxoko PPri Iñaki Zarraoa alkateak. “Hauxe da PPek duen demokrazia kontzeptua. Udalbatzarrean edo bestelako erakundeetako eztabaidetan esku hartzea, esate baterako, Espainiako Kongresuan edo Bizkaiko Batzar Nagusietan, eskubidea da eta ez beharra”, adierazi du udal agintariak. Aldi berean, "demokrazian hitz egiteko txandak borondatezkoak" direla aipatu du Zarraoak. "PPk ere ez du gaur hitza hartu gai batzuetan, nahiz eta horretarako aukera izan", gaineratu du. Argazkian, Iñaki Zarraoa alkatea.
Getxoko PPri "inkoherentziaz" jokatzea leporatu dio Zarraoak, "beste kolektibo batzuek egiten dituzten baimenik gabeko itxialdiak eta mobilizazioak salatzen duten bitartean, orain beraiek era berean jokatu dutelako". Alkatearen hitzetan, “PPek neurtzeko modu desberdinak ditu: saioa amaitu ondoren ez du bertan irauteko baimenik eskatu, baina protesta sistema hori bera erabiltzen duten beste kolektibo batzuk salatzen ditu”. Bere iritziz, “ekintza horrekin hedabideetan ohiartzuna edukitzea baino ez dute bilatzen, azken garaian ohituta gaituzten bezala". Azkenik, Zarraoak gogoratu du Gobernu Taldeak PPek udalbatzarretan aurkezten dituen mozioei ez erantzuteko erabakia hartu zuela, “alderdi horrek bere proposamenak ez dituelako horretarako dauden udal informazio batzordeetan aurkezten eta, osoko bilkurak baino lehen, hedabideetan ematen dituelako ezagutzera”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun