Martxoaren 9an jarraituko du Gallastegi, Hidalgo eta Gañanen kontrako epaiketa
Espainiako Auzitegi Nazionalean egiten ari zaien epaiketan, leporatzen dieten kale erasoan parte hartu izana ezeztatu dute Orkatz Gallastegik (Berango), Aimar Hidalgok (Algorta) eta Gaizka Gañanek (Santurtzi). 2000ko abuztuaren 11n Algortan autobus bat erretzea leporatzen diete hiru gazteei eta Ignacio Gordillo fiskalak 18na urteko espetxe zigorra eskatzen die, "sute terrorista delitua" egitearen akusaziopean. Europa Press albiste agentziak zabaldutakoaren arabera, data horietan "lagunekin Pontevedran (Galizia) oporretan" zegoela adierazi du Gañanek, "horrelako ekintzetan inoiz ez" duela parte hartu nabarmentzeaz gain. Hidalgok, berriz, "egun guztian lanean" egon zela aipatu du. Bestalde, Gallastegik fiskalaren galderei ez die erantzun nahi izan. Berak ere erasoan parte hartu izana ukatu du. Epaiketa martxoaren 9ra arte atzeratu egin dute. Argazkian, Aimar Hidalgo algortarra 2005eko uztailaren 19an Aranjuezeko espetxetik, 6.000 euroko fidantza ordaindu eta epaiketarik egin gabe kartzelan hamar hilabete egin ondoren. Gaizka Gañan santurtziarra ere kalean dago. Orkatz Gallastegi berangoztarra, ordea, espetxe barruan da. Jose Maria Lidon epailearen gaineko informazioa Urtzi Muruetari ematea leporatuta, 26 urteko espetxealdia ezarri zioten, 2005eko abenduan.
Gaurkoan ere, "errudunak zirela agertu nahian" ertzain etxean deklarazioa "sinarazi" egin zietela salatu dute hiruek. Ustez, erasoa gertatutako tokiaren inguruan aurkitu eta Hidalgoren ADN aztarnak edukiko lituzkeen txano berdeari dagokionez; egun horietan herrian jaiak izanik (Portu Zaharrekoak dira data horietan), urtero bezala, arratsaldetik aurrera koadrilarekin atera zela aipatu du algortarrak. "Portu Zaharreko tabernetan egon ginen eta gero Berangora joan ginen afaltzera, jantzi eta txano berdeekin zapatistaz mozorrotuta nihoala", azaldu du. Europa Pressen arabera, Gañan eta Gallastegiri deklarazioa hartzen egon ziren ertzainek, ordea, gazteek esandakoa ezeztatu dute, "borondatez aitortu" zutela adieraziz. Autobus gidariak ere lekukotasuna eman du gaurkoan: "sei edo zazpi gaztek ateak irekitzera behartu ninduten, bidaiariak irten ahal izateko. Ondoren, horietako batek gasolina txanbila hustu zuen eta autobusari sua eman zion", azaldu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun