Danimarka, Holanda, Errusia eta Espainiako taldeak arituko dira Getxoko Jazzaldiaren talde lehiaketan
Dagoeneko aurtengo Getxoko Jazzaldiaren talde lehiaketan parte hartuko duten taldeak hautatu dituzte. Aurten 66 taldek parte hartu dute aurreneko fasean eta, horien guztien artetik, People Are Machines (Danimarka), Thinktank (Holanda), Andrew's Quartet (Errusia) eta Mr. Chacho (Espainia) aukeratu ditu epaimahaiak. Talde horiek uztailaren 4tik 7ra bitartean arituko dira lehiaketako lehen saria eskuratzeko. Antolakuntzako iturriek adierazitakoaren arabera, Europako 17 herrialdetako taldeek hartu dute parte lehiaketan. Alemaniak, Poloniak, Espainiak, Danimarkak eta Belgikak aurkeztu dute talde kopururik handiena, Italia, Ingalaterra, Frantzia eta Txekiar Errepublikaren aurretik, besteak beste. Argazkian, iazko lehiaketa irabazi zuen Magnus Mehl Quintett boskote alemaniarrak.
Ohikoa denez, hautatutako lau finalistek esku-dirua jasoko dute, 900 eta 1.800 euro artean, kontzeptu guztiak barne (bidaia, egile-eskubideak eta abar). Taldeen egonaldia ere antolakuntzaren esku egongo da. Finalistek jaialdiaren lehenengo lau egunetan parte hartuko dute, hurrenez hurren, eta irabazleak berriro joko du azken egunean. Sariei dagokienez, 3.000 euro jasoko dituzte irabazleek eta disko bat grabatuko zaie zuzenean. Bigarren sariari 1.200 euro dagozkio eta, azkenik, bakarlaririk onenak 600 euro irabaziko ditu. Sariez gain, irabazleek Hoeilaarteko (Belgika) eta Ibizako (Espainia) jazzaldietan parte hartuko dute, Getxo Jazzek horiekin duen akordioari esker.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun