Era berean, martxoaren 19tik 28ra Leioako ezker abertzaleak antolatuko dituen Herri Jardunaldi irekietan euskara ere eztabaidagai izango da. Ordua zehazteke dagoela, mintegi berri hori martxoaren 20an izango da, Kurkudi herriko tabernan. Bitartean, txostenaren zirriborroa (pdf) eskura daiteke.
Hainbat datu soziolinguistiko
Leioako ezker abertzaleak jasotako datuen arabera, 2001ean leioaztarren %21,8 zen euskalduna eta %30 ia euskalduna. Ama hizkuntza %7,5ek zeukan euskara baina %2,9k baino ez zuen etxean erabiltzen. Bestalde, nabarmentzen dute herrian bi euskaltegi izanik, “azken urteotan, beherantz egin duela matrikulazioak”. Administrazioari dagokionez, eta 1999ko datuetan oinarrituta, ezker abertzaleak salatu du “lanpostuen %47ri soilik” jarri diotela “euskara jakitearen derrigorrezkotasuna”. Urte bereko datuen arabera gainera, aurrekontuaren %2,23 baino ez zuten euskarara bideratu.
Hizkuntza politikari buruzko tailerra egingo du arratsaldean Leioako ezker abertzaleak
“Hizkuntza politika ezberdinak: suntsitzailea, menperatzailea eta berreskuratzailea” izeneko tailerra eskainiko du Leioako ezker abertzaleak 19:00etatik aurrera. Hitzordua bertako Mastitxu Udal Euskaltegian izango da eta euskalgintzako eta beste herri mugimenduetako dozenaka lagun parte hartzen zein ingurukoei gonbitea luzatzen gonbidatu dituzte “ahalik eta jende gehienarengana hel gaitezen”. Leioan “hausnarketa eta argipena beharra” asetzea eta “euskararen mesederako hizkuntza politika” abiatzea helburu dituen mintegian, besteak beste, Mikel Galarza Batasunaren Euskara batzordeko partaidea izango da. Tailerrean Euskal Herrian orain arte garatutako hizkuntza politiken diagnosia egin eta ezker abertzaleak proposaturiko hizkuntza politika “berreskuratzailearen” nondik norakoak azalduko dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun