Aimar Hidalgoren atxiloketa salatzeko manifestazioa egingo dute iluntzean Algortan
Aimar Hidalgo algortarra atzo arratsaldean atxilotu zuten. Uribe Kostako Amnistiaren Aldeko Mugimenduak Etengabe bitakoran azaldutakoaren arabera, ertzainek bere etxera joan ziren 19:20an, baina gaztea bertan ez zegoenez telefonoz abisatu eta bere kabuz aurkeztu zen. Gaua Neguriko ertzain etxean pasa du, gaur goizean Getxoko epaitegira eraman, bertatik Basauriko espetxera, eta azkenik Madrileko Auzitegi Nazionalera heltzeko, 72 orduko epearen barruan. Orkatz Gallastegi berangoztarra eta Gaizka Gañan santurtziarrarekin batera epaitu zuten Hidalgo, 2000ko abuztuaren 11n Algortan autobus bat erretzea leporatuta. Hain zuzen, "abokatuak telefonoz egindako gestioen ondorioz jakin izan da 7 urte 6 hilabete eta egun bateko espetxe zigorra sartu dietela", errepresioaren aurkako erakundeak nabarmendu duenez. Argazkian, Aimar Hidalgo algortarra 2005eko uztailaren 19an Aranjuezeko espetxetik, 6.000 euroko fidantza ordainduta kalera atera zenean, kartzelan hamar hilabete egin ondoren.
Aimar Hidalgo algortarra 2004ko urriaren 20an atxilotu zuen Ertzaintzak auzi honengatik. Urriaren 21ean Soto del Real espetxean sartu eta 25ean Aranjuezera eraman zuten. 2005eko uztailaren 19an, 6.000 euroko fidantza ordaindu eta gero, kalera irten zen. Orkatz Gallastegi berangoztarra, ordea, espetxe barruan da. Jose Maria Lidon epailearen gaineko informazioa Urtzi Muruetari ematea leporatuta, 26 urteko espetxealdia ezarri zioten, 2005eko abenduan. Gaizka Gañan santurtziarrari dagokionez, dagoeneko eman dute bera atxilotzeko agindua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun