Algortako Korrika batzordeak antolatuta, ostegun honetan, martxoak 15, aurkeztuko dute Korrika 15, Patxeko I tabernan. Bertan, bertsolariak, hitzalditxoa, bideo emanaldia, kantaren aurkezpena, azkaria eta aurtengo edizioari buruzko xehetasun guztiak izango dute bertaratu nahi diren guztiek, 20:00etatik aurrera. "Heldu" lelopean lau egun lehenago Karrantzatik abiatu ostean, martxoaren 26an, goizeko 8:30ak eta 9:00ak artean helduko da Korrika Getxo udalerrira. Berangotik "Guecho" kartela ipintzen duen Salsiduko baserrian sartu eta Getxoko Ollaretxe, Ormatza estarta, Goñi, Gabriel Ramos Uranga, Maidagan, Aingeruaren etorbidea eta Bidezabal; Algortako Sarrikobaso, Algortako etorbidea, Mariandresena, Telletxe, Sarrikobaso berriro, Salsidu, Villamonte, Iparbide eta Makaletako etorbidea; Itzubaltzeta / Erromoko Avanzada, Gobelaurre, Santa Eugenia, Kresaltxu eta Ibaiondo; eta Areetako Kale Nagusia zeharkatu ondoren, Portugalete aldera joango da Bizkaiko Zubia hartuz. Baina motorrak berotzeko, martxoaren 23an, Algortako Getxo Antzokian, Korrika Kulturaleko jarduera berezi batekin gozatzeko aukera egongo da: Mokaua Logela Multimediaren ikuskizuna hain zuzen. Argazkian, Korrikaren 14. edizioak Bizkaiko Zubia igaro zueneko irudi bat.
Mokaua Logela Multimedia azken ikuskizunean, hiru musikarik abestiak kantatzen dituzten bitartean, bideo-jockey batek irudiak nahasten ditu zuzenean. Mokaua ikuskizunean musikariak pantaila erraldoi garden bateko irudietan integratzen dira, eta musika, irudiak eta mugimenduak zuzenean sinkronizatzen dira. Ez da kontzertu soil bat, 11 abesti eta 5 sketch umoretsu biltzen dituen ikuskizun multimedia koloretsua da. Saioa 20:00etan hasiko da eta gonbidapenak Lauaxeta euskaltegian eta Villamonteko kultur etxean eskura daitezke.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun