Euskal Herriko Unibertsitatea Espainian aplikatu den CD eta DVDak birziklatzeko lehenengo zerbitzuari (Cederika programa) batu zaion aurreneko erakundeetako bat izan da, EHUko iturriek gaur jakinarazi dutenez. Bizkaiko Sarbide teknologia enpresak Gaiker, Haizelan eta Recycling Plasten laguntzarekin sortutako sistema aitzindari hau, proba bat egin ondoren, 2006an jarri zen abian Bizkaian. Urtebetean, EHUk, CD eta DVDen birziklatze programa batean parte hartzen duen unibertsitate bakarrak, 30.000 disko inguru bidali ditu birziklatzera, hau da, tona erdi bat. Cederika proiektuan parte hartzen duten gainontzeko erakunde eta enpresek bezala, EHUk erabilitako CD eta DVDak batzeko edukiontzi bereziak ditu. Horiek Araba, Bizkaia eta Gipuzkoako campusetako ikastegi guztietan banatuta daude. Horrez gain, unibertsitateak diskoetan gordetako informazioa suntsitzen duten makinak ere baditu, diskoak birziklatzera bidali orduko erabiltzen direnak, egokitzat jotzen bada. Sarbide enpresak hartzen du diskoak batu eta Urtuellako Recycling Plasten birziklatze instalaziora bidaltzeko ardura.
DVDak eta CDak polikarbonatoz osatuta daude %99an. Material hau gama altuko plastiko bat da, pinturazko geruza mehe bat duena. Polikarbonatoa ez da hondakin toxiko bat, baizik eta hondakin geldo bat, baina era berean birzikla daitekeen lehengaia ere bada. Birziklatze prozesua honako hau da: lehenengo materiala birrindu eta garbitu egiten da, tintak eta metalezko geruza bananduz; ondoren, plastikoa urtu egiten da eta zati txikietan mozten da; prozesu honen ondorioz sortzen den masa, galautsa, hainbat produktu fabrikatzeko erabiltzen da, hala nola, ordenagailuen, telefonoen eta urrutiko kontrolen karkasak, eta autoentzako faroak, heldulekuak eta aginte-mahaiak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun