Izan ere, urterik urte kontsumitzaile eta erabiltzaile euskaldunok gero eta kexa ugariago bidali izanak egoerari buruzko azterketa berezitua egitea ekarri du. "Euskararen telefonoan kontsumitzaileen kexa ugari jasotzen ditugu", azaldu dute. Era berean, kontsumitzaile eta erabiltzaile euskaldunei Euskararen telefonoa erabiltzeko deia egin diete. "Ez dago kontsumitzaileen edo erabiltzaileen eskubideez hitz egiterik, hizkuntza-eskubideen bermerako mekanismo eraginkorrak abian jartzen ez badira".
Horrexegatik Behatokia eskubideen urraketak Euskararen telefonoa zerbitzura helarazteko deia egin du. Euskara erabiltzeko eskubidea ez bazaie errespetatu edo euskara erabiltzeagatik kaltetua izanez gero 902 194 332, 0559 594 949 edo www.euskararentelefonoa.com webgunea balia ditzatela eskatu du.
Kontsumitzaileen nazioarteko egunean Hizkuntz Eskubideen Behatokiak kontsumitzaile eta erabiltzaile euskaldunon hizkuntza-eskubideak gogora ekarri nahi izan ditu. Behatokiak txosten berezitua argitaratu berri du gai honen inguruan: "Kontsumitzaileen eta erabiltzaileen hizkuntza-eskubideak Euskal Herrian". Behatokiak Europa Kontseiluko, Europako Batasuneko, bi Estatuetako eta autonomia-erkidegoetako araudiak aztertu ditu. "Araudia aztertu dugu eta gure hizkuntza-eskubideak urratzea merkea dela ondorioztatu dugu", adierazi dute ordezkariek. Kontsumitzaile eta erabiltzaile euskaldunoi bizi garen lurraldearen arabera hizkuntza-eskubideak aitortzen zaizkigun arren, horien urraketak Euskal Herri osoan gertatzen dira Behatokiaren arabera. Argazkian, aita-amak umetxoarekin batera erosketetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun