Astelehenera arte dago Urdulizko lehenengo etxebizitza babestuetarako izena emateko
2007ko mar. 15a, 17:53
Astelehen honetan, martxoak 19, Urdulizko etxebizitza publikoen eskatzaileek udal erregistroan izena emoteko azkenengo eguna izango da. Erregistro horrek helburu bikoitza dauka, udal iturrien arabera: alde batetik, Udalak jakin ahal izango du etxebizitza publikoaren eskaera zenbatekoa den udalerrian, eta modu honetan bere "etorkizuneko etxebizitza politikan erabakiak hartu" ahal izango ditu. Beste alde batetik, erregistro honetatik Sociedad Urduliz Urbanismo SAk Urdulizko Elortza auzoko 42 eremuan eraikitzen dabilen babes ofizialeko 60 etxebizitzen eskatzaileen behin-betiko zerrenda irtengo da. Aipatutako sozietatea Udalak berak sortu du herritarren artean etxebizitza publikoa bultzatzeko. Argazkian, Juan Olea Urdulizko alkatea Miren Dobaran Berangoko udal agintaria alboan duela.Epe hau amaituta eskatzaileen dokumentazioa berrikusiko da, eta zuzen beteta duten arabera, eskatzaile "egoki eta ez egokien" zerrenda bat egingo da publiko. Zerrenda horiek Udalak erabiltzen dituen iragarki-tauletan ipiniko dira. Izenak behin argitaratuta, dokumentazioa behar den moduan aurkeztu ez dutenek 20 eguneko epea edukiko dute hutsuneak betetzeko. Horren ostean, Sociedad Urduliz Urbanismo SAko Administrazio Batzordeak babes ofizialeko 60 etxebizitzen zozketarako oinarriak onartuko ditu. Horien arabera erabakiko da erregistroko zein eskatzailek betetzen duen zozketan sartzeko beharrezko baldintzak. Etxebizitza babestu horiek udalerrian eraikitzen diren lehenengoak izango dira. "Udalak asmoa dauka etorkizunean etxebizitza publiko gehiago egiteko udalerriak dauzkan beharrizanei erantzuteko", iragarri dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun