Sindikatuaren kalkuluen arabera, Aidari 2.085,60 euro zor zizkion enpresak eta diru kopuru hori aldarrikatu zuenean lanpostutik bota zuten bere kontratuak zehazten zuen probaldiaren azken aurreko egunean. Halere, eta Nagoreren aldeko lekukotasuna izanda ere, epaiketa galdu zuen, “antza, arrazoi burokratikoak direla medio”.
CNTk gatazka laboralean sartzea erabaki zuen eta hainbat kontzentrazio burutu du kafetegiaren aurrean, “emaitza nahiko onak” eskuratu dituela. Azken boladan, bazkalorduan egiten dituzte mobilizazioak, “nahi dugun eragina sortzen dutela. Izan ere, lokalaren erabiltzaile eta kontsumitzaile askok, jabeek gure lankideei egindako injustiziaren berri izatean, bere elkartasuna adierazi eta jatetxearekin ez kolaboratzea erabaki du”. Azken aparteko mobilizazioa Emakumeen Egunean burutu zuten, Bilboko manifestazioan kanporatutako beharginen aldarrikapenak pankartaz eta esku orriz zabaldu zituztela.
Baina, CNTtik argi utzi nahi dute Megapark Cafearena ez dela kasu isolatu bat, Megapark merkataritza guneko Leroy Merlin, Ikea, Decathlon eta bestelako enpresetan ematen den “lan baldintza eskasen” adibidea baizik. Sindikatu libertarioaren arabera, ehunaka dira behin-behinekotasun egoeran dauden beharginak Megaparken. Gainera, Barakaldoko langabetuen asanblada, ESK, ELA, Berriotxoa, Argitan, JOC eta CNT berak urtarrilean Ezkerraldea osoan salatu zuten langile gehienek jardunaldi erdia edo gutxiago dutela, 345 bat euro kobratuz. Egun osoko soldatak ere ez doaz oso urrun: 720 bat euro. Era berean, kontratu ohikoenak “lana amaitu arte” (Ikean), “hilabete baterako” (Toys’r’Us eta Decathlon) edo “hiru hilabetetarako” (Leroy Merlin), edo hilabeteak jarraian lan egiten duten beharginei jarraian egiten dizkieten ordukako zein eguneko kontratuak direla salatu dute. Gainera, aparteko orduak ez dira balio duten kopuruetan zenbatzen edo, zuzenean, “ez dira ordaintzen”.
Protestaldiaren egitaraua:
- 10:30ean, irteera Barakaldoko CNTren egoitza sindikaletik.
- 11:00etan, Artaza hotelaren aurrean, kontzentrazioa.
- 13:00etan, auto-karabana.
- 14:30ean, elkartasun bazkaria.
- 18:30ean, manifestazioa Barakaldoko San Bizente plazatik.
- 21:30ean, Ez Jaun Ez Jabe talde libertarioak antolatutako kontzertua Barakaldoko Dorretxea gaztetxean.
Megaparkeko kanporaketak salatzeko Artaza hotelaren aurrean kontzentratuko dira bihar
Bihar, larunbata, goizeko 11etan Neguriko Artaza hotelaren aurrean kontzentrazioa burutuko du CNT sindikatuak. Mobilizazio hori Barakaldoko Megapark Cafe jatetxetik kaleratutako bi langileak berriro kontrata ditzaten aldarrikatzeko deitu du sindikatu anarkistak. Izan ere, Buen Comer y Estar SL, Aida eta Nagore izeneko beharginak kale gorrian utzi dituen enpresa, ostalaritzako hainbat negozioren jabe izateaz gain, Artaza hotelaren bazkide kapitalista ere bada. CNTk zabaldutako informazioaren arabera, Aidak “behartuta” egin zituen aparteko orduak ordaintzea aldarrikatu ostean kaleratu zuten. Nagoreren kasuan, berriz, bere lankidearen alde epaitegian deklaratzeagatik utzi zuten kalean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun