Ez Jaun Ez Jabek jaialdia egingo du bihar Barakaldon, bi militante libertariori jarritako 5.000 euroko isuna kitatzeko

Uribe Kostako Ez Jaun Ez Jabe talde libertarioak jaialdia antolatu du biharko, larunbata, martxoak 17, desalojo "mehatxupean" dagoen Barakaldoko Dorretxea gaztetxean. Arratsaldeko 7etatik aurrera, Leioako Claro Que Si eta Rinconcete en Tu Retrete kantautoreek berotuko dute giroa. Ondorengo kontzertuan, Itzubaltzeta / Romoko Okupando Rom@, Bartzelonako Bandera Negra, Gasteizko Akrata (argazkian) eta Leongo Hachazo musika taldeak arituko dira. Sarrera 4 eurotan erosi ahal izango da gaztetxean bertan eta dirua Bizkaiko Asanblada Libertarioko bi kideri iazko Maitzaren Batean Bilboko udaltzainek jarritako isunak kitatzera joango da. Udaltzainek "langileen duintasunaren defentsan" jartzen ari ziren militanteak identifikatu zituzten eta 2.500 euroko isun bana bidali diete orain dela gutxi, kartelak jartzeaz gain "autoritateari desobedientzia" egiteagatik. BALek "neurriz kanpokotzat" jo du gertaera.