Hilda agertu zen ertzainari Itzubaltzetan emango diote azken agurra iluntzean
Gaur arratsaldeko 7etan, azken agurra emango diote M.A.F.N. ertzainari Itzubaltzeta / Romoko San Jose elizan. Polizia, Erneko kidea eta hainbat gimnasioetako bazkidea zena, 36 urte zituen eta Martuteneko kartzelan ziharduen zaintza lanetan. Hain zuzen ere, herenegun, igandea, M.A.F.N.ren ordutegi bereko beste ertzain batzuek hilik topatu zuten kartzela horretako areto batean. Bertaratu zen medikuak ertzaina hilda zegoela ziurtatu eta gorpuaren ondoan tiroren bat egin berri zuen ertzainaren pistola topatu zuen, EAEko Herrizaingo Sailak eta hainbat hedabideek zabaldutakoaren arabera. Teoria nagusia bere buruaz beste egin zuela izan arren, gorpuari Donostian egindako autopsiaren datuak jakinarazi arte ezin izango da baieztatu. M.A.F.N. 1994ko otsailaren 7an sartu zen Ertzaintzaren Arkauteko akademian, 13. promozioaren barruan, saioaldiango funtzionario gisa. 1995eko azaroaren 29an, berriz, karrerako funtzionarioa izendatu zuten 13.155 zenbakiarekin. Argazkian, Ertzaintzako 19. promozioko dozenaka polizia Ibarretxeren aurrean.
59 urte bete dituen Martuteneko espetxean 320 bat preso daude egun, 150entzako lekua baino ez dagoenean. 2004an kartzela ixtea mahaigaineratu zen Espainako Espetxe Zuzendaritzan zituen baldintza eskasak zirela eta. 2006ko abenduaren 20an, berriz, SOS Arrazakeria, Salhaketa eta Arratz elkarteek Jaime Leiva zuzendariaren kargu-uztea eskatu zuten, Abdel Karim el Ddah preso sahararraren heriotzaren ostean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun