Getxo udalerriko zaborrak Zabalgarbira eramatea "oztopatu" zutela harro zioten, 2005eko maiatzean, EB-Berdeek. Halandabe, ematen du Luis Almansa Getxoko PSE-EEko bozeramaileak azken egunotan salatutakoa egia dela eta hondakinek erraustegirako bidea egiten ari direla, Jatako zabortegira eraman beharrean. Hainbat komunikabidek jasotakoaren arabera, Iñaki Zarraoa alkate jelkideak argi eta garbi dio Bizkaiko Foru Aldundiarekin adostutako hitzarmenak ez duela zarama Zabalgarbira eramatea baztertzen. Iñaki Urkiza Getxoko EB-Berdeen eledun eta hautagaiak, ordea, hori egiaztatzen bada, "beharrezkoak diren neurri politiko eta judizialak" hartuko dituela iragarri du. Kontua da, hilabete batean, udal gobernuko bazkide diren EAJk eta Ezker Batuaren iritziek talka egiten duten bigarren aldia dela. Udal hauteskundeetarako gutxi gelditzen dela, aurrekoan Getxorako hirigintza egitasmoaren inguruko adostasun eza azaleratu zuten biek. Argazkian, zaborren transferentzia gunea.
Iosu Madariaga Ingurumen ahaldunak berak joan den astean onartu zuen, hilabete batetik hona, Getxo udalerriko zaborrak Zabargarbi erraustegira eramaten ari direla; baita horretarako Getxoko Udalaren "onespena" dutela. Hori ezagututa, "hitzarmena ez betetzea" egotzi zion aldundiari Urkizak, "ingurumenari begiratuta errausketa sistema iraunkorra ez delako". Are gehiago, "gezurtitzat" jo zuen diputatua, tokiko erakundearen "baimena" zuela esateagatik. "Gauzak horrela direla baieztatzen badugu, beharrezkoak diren neurri politiko eta judizialak", gaineratu zuen udal ordezkariak. Bitartean, Almansak "koherentziarik ez" izatea egotzi dio Ezker Batuari, "zarama Zabalgarbira eramaten bazuten, gobernu hitzarmena apurtuko zuela aipatu zuelako bere garaian". Urkizak apurkeztarik ez dela izango erantzun dio bueltan, "Udalak baimenik ez duelako eman eta hitzarmena betetzen ez duen bakarra Aldundia delako".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun