"Getxoko gizarte-kolektiboekin topaldia" izenburupean, atzo batzeko gonbitea luzatu zien, aste hasieran, udalerriko hainbat elkarteei (baina ez guztiei) EAJk. "Euzko Alderdi Jeltzaleak eta Getxoko alkatetzarako hautagaia den Imanol Landa Jauregik gonbidatzen zaituzte udalerriko zenbait gizarte-taldekin batera izango duten topaldira" zioen hitzez hitz txartelak. Halabaina, 20:15ean, Itzubaltzeta / Romoko Santa Eugenia plazara hurbildutako talde askok (jelkideekin harreman zuzenik ez dutenak behintzat) ez zuten inondik inora espero zutena aurkitu. Ustez alkategaiaren eta kolektiboen arteko iritzien elkartrukea izan behar zuena maiatzaren 27ko udal hauteskundeei begirako ekitaldi politiko hutsa baino ez zen izan. Bertan aurkeztu zituen bere hautagaiak Getxoko EAJk, jarraitzaileen txaloen eta hainbat taldeetako kideen harridura aurpegien artean. Argazkian, Imanol Landa atzoko mitinean gainontzeko hautagaiak atzean dituela.
Santa Eugenia plazan jarritako karpa handia, udaltzainen patruila-autoak bide bazterrean... "larregi topaketa baterako" pentsatu zuten, heldu eta berehala, atzo Itzubaltzetara joandako hainbatek; beste askok, ordea, argi zeukaten zertara zihoazen. Karpara sartzean ere batzar baten antzik ez zeukan panoramak: ehun pertsonatik gora aretoan, mahai txikiak han eta hemen, eta aurre-aurrean atrila mikrofonoarekin, albo batean, Landaren aurpegia pantaila batean proiektatuta ikus zitekeela. Guzti horren atzean zegoen panel erraldoia guztiz argigarria suertatu zen oraindik ere nahasita zeudenentzat: mitin onik ez dago baldin eta alderdiaren ikurra eta hautagaiaren izena handi-handi ikusten ez badira. Ekitaldiaren hasiera ere ez zen nolanahikoa izan. Aurkeztu eta berehala, atrilera igo eta, besteak beste, Iñigo Urkullu EAJko Bizkaiko Buru Batzarreko lehendakariari, Jose Luis Bilbao Bizkaiko ahaldun nagusiari, Ana Madariaga Bizkaiko Batzar Nagusietako lehendakariari eta Iñaki Zarraoa alkateari eman zizkien eskerrak Landak, bertan egoteagatik. Horren ostean, gainontzeko hautagaiak aurkeztu zituen alkategai jelkideak, udal hauteskundeetarako programaren ildo nagusiak azaltzen hasi baino lehen. Elkarteentzako, ordea, gauza handirik ez; taldeen iritzia ezagutu asmoz, elkarrizketak izango direla egindako promesa agian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun