Espero denez, ostiral honetan (martxoak 30) onartuko du, behin betiko, Maidaganeko trenbide-pasagunea lurperatzeko proiektua, Bizkaiko Garraio Partzuergoko kontseilu orokorrak. Hainbat komunikabidek zabaldu eta gero, dagoeneko jakina zen arren, atzoko prentsaurrekoan egin zituen horren gaineko adierazpenak Iñaki Zarraoa alkateak. Getxoko PPk biharko udalbatzarrerako aurkeztutako sei mozioetatik, pasonibela "ahalik eta lasterren" lurperatzea eskatzen duenari emandako erantzuna baliotu zuen udal agintariak, hainbat xehetasun emateko: Zarraoak adierazitakoaren arabera, "2007ko bukaeran hasiko dira lanak".
Orotara, hiru urte baino gehiagoko (38 hilabete) iraupena izango omen dute, Getxo aldean, Maidaganeko trenbide-pasagunea lurperatzeko lanek. Lehendabizi, Bizabal eta Berango arteko Ibarbengoa metro geltokia eraikitzeko asmoa dute. Ondoren, trenbide lerro bina jarriko dituzte, gaur egunekoa ez erabili eta metro zerbitzua eten behar ez izateko. Orduan hasiko dira pasonibela lurperatzen. Proiektuak 36 milioi euroko aurrekontua du.