Ostiraleko udalbatzarraren ostean, Getxoko EB-Berdeek adierazitako "gezur borobilak" gogor erantzun dituzte gaur federalisten udal gobernukide diren EAJk eta EAk. Iñaki Urkiza Ezker Batuko zinegotziak esandakoari aurre eginez, "errausketari ezetz borobila eman" diotenik edota "azkenean errausketak dakartzan kalteak onartu" dituztenik ukatu dute bi alderdiek. Erantzun txandan adierazitakoa berretsi dute EAJk eta EAk, hots, "hondakinak zabortegira eramatea ingurumen aldetik errausketa baino jasangaitzagoa eta arduragabeagoa" dela. Halaber, udal hondakinen kudeaketaren gaineko erabakia Agenda 21 udal egitasmoaren eztabaida-lekuaren eskuetara igaro denik ukatu dute. Hirukoak onartuta, udal idazkariari eskatu zaizkion bi txostenak Bizkaiko Foru Aldundiak tokiko hondakinen kudeaketarako hitzarmena hautsi duen ala ez "argitzeko baino ez" dira izango.
Aipatu osoko bilkuran, mozioa aurkeztu zuen Ezker Batuak, Iñaki Zarraoa alkateak Bizkaiko Foru Aldundiari udal hondakinak errausteari utz diezaiola premiatzea lortzeko asmoz. Foru erakundeak eskaera aintzat ez hartzekotan, udal hondakinen kudeaketa arautzen duen hitzarmena bertan behera uztea ere eskatzen zuen EBk, akordio hori hautsi dutelakoan. "Udal idazkariaren txostenean oinarrituz, inolako hausterik ez dela egon ulertuta", hori sakonago aztertzeko txosten berriak egitea proposatu zieten federalistei EAJk eta EAk; baita horien emaitzak ezagututa, hitzarmenaren jarraipen batzordean aztertzea, "udal hondakinen kudeaketa planifikatzeko asmoz". Hiru alderdiak ados jarri ziren orduan eta, horrek PSE-EE eta PPko zinegotziak erretxindu zituen: "udal hauteskundeak gainean ditugula aurpegia garbitu nahi izatea" leporatu zieten EAJ eta EBri (EA ez zuten aipatu) popularrek eta sozialistek. Getxo Biziak bere iritzia argi utzia zeukan aurretik eta, gertatutakoaren aurrean, "tristetasuna" adieraztera baino ez zen mugatu Josu Amezaga herri plataformako eledunak. Hiri hondakinen aferan "Ezker Batuak EAJren jokoari jarraitu" diola uste du ezker abertzaleak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun