Herri lanak direla eta, ibilbidez aldatu behar izan dute Kristoren pasio antzeztuaren kalbarioa, Berangon. Urtero bezala, Ostiral Santuan (bihar) egingo dute; baina Simon Otxandategi kaletik joan beharrean; Berangotxutik abiatuko dira aurten Munarrikolanda bidean, Gobela errekarekiko paralelo dagoen txaleten kaletik udaletxe atzealdearaino iristeko. Bertan antzeztu ohi dute gurutziltzaketa. Herri-etxean egiten ari diren lanak ere aldaketak eragin dituzte biharko ekitaldian. Inguruan hainbat eszenatoki jarri ohi dituzte: besteak beste, Herodes agertzen den pasartea tokiz aldatu behar izan dute. Aldaketak gora eta behera, 250 lagun inguruk parte hartuko du Arte Eszenikoen Lagunak kultur elkarteak antolatutako pasioan; horietatik 170 dira aktore. Iaz bezala, Roberto Urrutia (Jesu Kristo) eta Maria Basaguren (Ama Birjina) izango dira protagonista. Maria Magdalenaren papera, berriz, Mari Paz Domingok egingo du. Argazkian, Jesu Kristo gurutzera igotzen.
Aurreko pasarteak udaletxe aurrean eta Dolores Aguirreren etxe inguruko lorategietan egin ondoren, herri-etxearen atzealdean antzeztuko dute gurutziltzaketa. Guztira, 3.000 eta 4.000 ikusle artean izatea espero dute antolatzaileek. Aurrekoetan bezala, 500 bat aulki jarriko dituzte agertoki nagusietan, pasioak daukan kostu handia (23.000 euro inguru) ordaintzeko asmoz. "Udalak eta Aldundiak laguntza txikia ematen digute. Gastuen laurdena ordaintzeko ere ez du balio", adierazi du Fernando Ansoleaga zuzendariak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun