Osasun Jaia ospatuko dute bihar Akarlandan
2008ko ira. 26a, 19:57
Eusko Jaurlaritzako Osasun Sailaren eta BBKren laguntzaz, Osasun Jaia antolatu du larunbat honetarako, irailak 27, Erandioko Drogamenpetasunen Prebentziorako Udal Batzordeak; gehienbat udalerriko ume eta gazteei zuzenduta. Hain zuzen ere, "Gogoratu, zure eskubideak defendatu eta zabaldu" lelopean egingo dute jaialdia, Akarlanda parkean (Unbe). Ekitaldi horretan, "bizimodu osasuntsua eta ingurumenaren babesa sustatzeko eta alkoholdun edarien zein tabakoaren kontsumoa prebenitzeko" xedea duten jolasak eta ikuskizunak izango dituzte neska-mutilek, egun osoan zehar. Eta, aurreko urteetan bezalaxe, aurtengo ekitaldian ere garrantzi berezia emango diete haurren eskubideei, tokiko arduradunek adierazi dutenez. Horretaz gain, txistularien kalejira, Erandioko Udal Musika Bandaren kontzertua, euskal dantza agerraldia, puzgarriak eta globo aerostatikoa izango dira. Halaber, autobus zerbitzu berezia jarriko dute bertara heltzeko. Argazkian, hainbat mutiko arku-tiroan.Erandiotik Akarlandara heltzeko, 9:00etatik 16:00etara egongo dira autobusak. Horrenbestez, orduro izango da Unberako bidaia, 12:00ak arte, Altzagako metro geltokitik abiatuta. Bueltatzeko, berriz, Akarlandako Gurutze Gorriko postuan hartu ahal izango da autobusa, orduro, 13:00etatik 16:00etara. Astrabuduan (Mezo kaleko autobus geralekuan) eta Erandio Landako Andra Mari elizan ere hartuko dituzte bidaiariak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun