Udal Arautegia berritu ezean epaitegira eramango dute alkatea Getxoko PPk eta PSE-EEk
Getxoko PPk eta PSE-EEk idatzia aurkeztu dute gaur goizean, udal erregistroan, tokiko erakundeari 2007ko azaroaren 8ko osoko bilkuran hartu zen erabakia bete dezala eskatuz. Udal batzar horretan, 1983tik indarrean dagoen Udal Arautegi Organikoa aldatzea onartu zen popularren eta sozialisten botoekin. Alabaina, udal idazkariaren txostenean oinarrituta, Imanol Landa alkateak behin baino gehiagotan adierazi du erabaki hori "gauzaezina" dela, "besteak beste, Espainiako Legedia urratzen dutelako" PPk eta PSE-EEk onetsitako idatziaren hainbat artikuluk. Marisa Arrue eta Luis Almansa oposizioko alderdietako bozeramaileen ustez, ordea, "hori egia bada, bi hilabeteko epea, hau da, urtarrilaren 8ra arte eduki du (Landak) administrazioarekiko auzi-errekurtsoa aurkezteko; eta ez du egin". Ondorioz, azaroko udal batzarrean hartutako erabakia "balioztatu" duelakoan daude biak. Udal Arautegi Organikoa berritu ezean epaitegira eramango dute alkatea Getxoko PPk eta PSE-EEk. Argazkian, Arrue popularra eta Almansa sozialista aurreko prentsaurreko batean.
Behin idatzia udal erregistroan aurkeztuta, Bizkaiko Aldizkari Ofizialean jarri beharko du iragarkia Imanol Landa alkateak, PPk eta PSE-EEk emandako argibideen arabera. "Hortik aurrera, hilabeteko epea izango dute alderdi politikoek zein herritarrek alegazioak aurkezteko. Akabuan, udalbatzak eman beharko dio oniritzia idatziari", azaldu dutenez. "Alegazioak aurkezteko prozesu horretan, alkatearekin eztabaidatu eta guztion gustuko idatzia adosteko zabalik egongo gara", aipatu du Arruek. Hala ere, dagoeneko hilaren 9an epaitegira jotzeko prest zegoela jakinarazi zuen Almansak. Gaurkoan, horrekin ados agertzeaz gain, azaroko osoko bilkuran hartutako erabakiaren "legezkotasunaren gainean gezurra esatea" leporatu dio Landari PPk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun