Eusko Abertzale Ekintzak (EAE), Euskal Herriko lehenengo ezker abertzaleko alderdia, datorren maiatzaren 27ko udal eta foru hauteskundeetan parte hartzeko legezko ordezkariak izendatu zituen atzo Hautes Batzordeetan. Gara.net-en aburuz, Araba, Gipuzkoan eta Nafarroan egin du eginkizun hori. Berriz, "El Correo Español"-en arabera, Araba, Bizkaian eta Gipuzkoan eta eitb24.com-en iritziz Hego Euskal Herria osoan. Gauzak horrela, Berria.net-ek jakinarazi duenez, atzo zen horretarako epemuga eta, orain, hauteskundeetan parte hartzeko hautagai zerrendak aurkeztu beharko ditu apirilaren 18tik 23ra. Dagoeneko, Espainiako Gobernuko Barne ministroa, Alfredo Perez Rubalcabak esan du bai hautesle taldeek eta bai EAEk "legea bete behar izango dutela" hauteskundeetan egongo badira.
EAE 1930eko San Andres egunean sortu zen, EAJtik bereiztuz, eta euskal nazionalismoaren kontzeptuak eraldatu zituen autodeterminazioan eta nazio lurraldetasunean oinarrituz. 1935ean, sozialismoaren aldeko apustua egin zuen. 1936ko hauteskundeetan, Fronte Popularraren barnean aurkeztu zen. Gerran lau batailoi sortu zituen eta Frankismoaren ostean legalizatua izan zen, 1977ko apirilaren 14an, Espainiako Errepublikako urteurrenean. Urte horretako Espainiarako hauteskundeetan 6.435 boto jaso zituen Bizkaia eta Gipuzkoan. ESBrekin hilabete batzutan fusionatu eta gero, 1978an Herri Batasuna koalizioan sortu zuen ESB, LAIA, HASI eta hainbat independienteekin. HB eta EH barruan beti gorde zuen erabateko independentzia eta, 2001ean, Batasunan ez sartzea erabaki zuen. 2002an orain arteko azken kongresua burutu zuen eta 2006an Gasteizko Legebiltzarrean Antton Gómez Lorente eta Jose Alberto Muñoz EAEko ordezkariek salatu zuten EITBrengandik alderdiak pairatzen duen "boikot informatiboa". Batasuna, HB eta EH ilegalizatu zituen prozesuan, EAE, Zutik eta Askatasuna plataforma ere ilegalizatzea gomendatu zuen Guardia Zibilak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun