Bost adingabe atxilotu dituzte Sopelan beste bi gazteri surf ohola lapurtu dietelakoan
Getxoko ertzain etxeko agenteek bost adingabe (14 eta 17 urte arteko hiru neska eta bi mutil) atxilotu zituzten asteazkenean Sopelan, indarkeria erabiliz beste bi neraberi 120 euroko surf ohol bat lapurtzea leporatuta. Eusko Jaurlaritzako Herrizaingo Sailak zabaldutako bertsioaren arabera, gaueko bederatziak aldera, bost adingabek Atxabiribil hondartzan egindako lapurreta baten berri jaso zuen polizia autonomikoak. Bi neskato nerabe bertan zeuden, hiru neskak eta bi mutikok osatutako talde batek eraso zienean; hainbat kolpe eman ostean, surf ohol bat kendu zieten eta jarraian Larrabasterrako metro geltokirantz irten ziren korrika. Ertzain bikote batek, bertan zegoen Getxo udalerriko udaltzain baten laguntzaz, lapurretan nahasitako bost lagunak aurkitu zituen. Argazkian, hainbat ertzain auto, artxiboko irudi batean.
Haien ondoan, 120 euro balio dituen kirol tresna hori topatu zuten lurrean botata. Guztiak atxilotu zituzten, indarkeria erabiliz egindako lapurreta delitua egotzita. Gertakarian nahasitakoek Adingabekoen Fiskaltzan agertu beharko dute aurki.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun