"Ziur Urdulizko biztanle askok herrian orain dela hainbat hamarkada ateratako argazkiak dauzkazuela gordeta. Irudi horiek gure herria zelangoa zen ikusteko atalaia antzeko bat dira, gutako asko jaio baino lehenago herria zelangoa zen jakiteko ere bai. Horregatik Udalak altxor txiki hauek liburu batean batu nahi ditu, gure iraganaren lekukotza grafikoak dira eta", azaldu dute udal arduradunek.
Liburu bat egiteko asmoz antzinako argazkiak batzen hasi dira Urdulizen
2007ko api. 18a, 13:20
Urdulizko Udalak herriko lehengo irudiak jasoko dituen liburua egingo du. Hori dela eta, urduliztarrei ekimen interesgarri honetan parte hartzeko deialdia egin die, eurek dituzten erretratu zaharrak denbora labur batez utziz, liburua argitaratu ahal izateko. Argitalpen horrek XIX. mendearen amaieran hasi eta 80ko hamarkadara bitarteko argazkiak batu nahi ditu. Irudiok koadrilenak, jende taldeenak edo herriko argazki panoramikoak izan daitezke. "Modu honetan, gure herriko lehenaldia erakutsi nahi da, herritarren eta udalerriaren paisajearen eboluzioaren bitartez", diote udal arduradunek. Argazkiak udaletxera eraman beharko dira, astelehenetik ostiralera, 9:30etik 13:30era bitarteko ordutegian. Erretratuak gutunazal baten sartu behar dira, jabearen izena eta telefono zenbakiarekin batera, gero irudiok arazo barik bueltatu ahal izateko. Posible bada, argazkiekin batera, noiz egin ziren, bertan agertzen direnen izenak eta atera ziren testuinguruaren azalpena ipini behar da. Argazkiak eramateko azken eguna ekainaren 15a izango da. Argazkian, Urdulizko antzinako irudi bat.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun