Ekitaldien artean, ostegun honetan, apirilak 19, Atfal elkarteko kideek hitzaldia eskainiko dute, errefuxiatuen kanpamenduetan zein Getxo udalerrian aurrera eramaten ari diren zenbait egitasmori buruz. Arratsaldeko 7etatik aurrera izango da saioa Algortako kultur aretoan, Villamonten. Ordu berean, baina ostiralean, luntxa izango da Aidai kulturgunean. Horretara, besteak beste, Getxoko Udaleko ordezkariak, elkarteko kide ohiak, udan saharar haurrak euren etxeetan hartzen dituzten familiak, boluntarioak eta elkarteko bazkideak gonbidatu dituzte. Igandean, berriz, Sahararen Eguna ospatuko dute, goizeko 11:00etatik aurrera, San Nikolas plazan. Ordu horretan, Itxas Argia dantza taldeak saioa eskainiko du eta 13:00etan arabiar munduari lotutako antzezpena izango da. 14:00etan, berriz, herri bazkaria egin dute. Horretaz gain, goizean zehar, tea dastatu eta henna tailerretan eta hainbat jolasetan parte hartzeko aukera egongo da. Azkenik, 17.00etan Omargia saharar musika taldeak eskainiko du kontzertua.
Herri lasterketa
Datorren igandean, hilaren 29an, goizeko 11:00etan Sahararen aldeko II. Herri Lasterketa aterako da Ereagako hondartzatik eta, Bizkaiko Zubiraino joan ostean, hondartzara itzuliko da berriro, guztira 5.000 metroko ibilbidea eginez. Izena eman nahi dutenek 27ra arte (19:00etan) izango dute horretarako aukera, Algortako Torrene kaleko Kantxa Kirol Moda dendan edo Euskadiko Kutxako Algorta (Amesti 15-17) eta Areetako (Kale Nagusia 23) bulegoetan. 3 euro baino ez dira.
Getxo udalerriko Sahararen aldeko Atfal elkartea duela hamar urte sortu zen saharar herriaren eskubideak aldarrikatzeko helburuarekin eta, horrez geroztik, zenbait proiektutan (haurren harrera udan, karabana solidarioa, Tindoufeko kanpamenduetan emakumezkoen hezkuntza, Smarako emakumeentzako etxea eraikitzea...) parte hartu du Getxoko Udalaren laguntzaz. Aurten hamargarren urteurrena izanik hainbat ekitaldi antolatu dituzte datozen egunotarako, horien artean, Sahararen Eguna igande honetan (apirilak 22) eta II. Herri Lasterketa Solidarioa, hilaren 29an. Horien aurkezpenean bai Atfal elkarteko ordezkariek, bai Udalekoek azpimarratu dute ospakizun gazi-gozoa dela, “gazia saharar errefuxiatuen arazoak bere horretan dirautelako eta gozoa getxoztarrek gatazka hori konpontzeko hartutako konpromisoagatik eta sahararren bizi-baldintzak hobetzen saiatzeagatik ere". Argazkian, iazko udal etorritako saharar umeak, txango batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun