Gaurkoan, François Arbelo Itsas Joko Atlantikoen nazioarteko batzordeko idazkari nagusiak adierazi duenez, “Getxo eta Sopelan 2008an egingo diren joko hauek izango dira abiapuntua Atlantikoko ardatzeko beste erregio eta herrialde batzuetara zabaltzeko, hala nola, Kanariar Uharteak, Katalunia eta Andaluziara; kirol modalitate berriak sartzearekin batera”. EKFB-k 2008ko Jokuen egoitza finkatzeko erabakia hartzerakoan kontuan hartu dituen arrazoiak, "Getxori dagokionez behintzat", honako gai hauei lotutakoak dira, tokiko iturrien arabera: "geografia, azpiegiturak, garraiobideak, herritarren abegitasuna, herriaren irudia eta, batez ere, gure udalerriaren itsas kultura, bela, arraunketa eta surfean oinarritutakoa dela, eta baita goi mailako jardueren antolaketan eskarmentu handia duelako".
Mila kirolaritik gora
Itsas Joko Atlantikoak urtero udaldian mila kirolaritik gora batzen ditu, aipaturiko eskualde eta herrialdetatik etorritakoak. Kirol aste hau, gainera, kultura egitarau garrantzitsu batekin osatzen da, kontzertu eta era askotako ikuskizunez beterikoa. Getxo eta Sopelako hitzordua Joko Olinpikoak egiten diren bitartean izango da, “baina Itsas Joko Atlantikoak, ostera, aukera paregabea dira Pekinera joango ez diren kirolarientzat”, antolatzaileek nabarmendu dutenez.
Euskal Kirol Federazioen Batasunak (EKFB) eta Getxo eta Sopelako udalek gaur goizean sinatu dute Uribe Kostako bi herrietan 2008ko uztailean egingo diren XIV. Itsas Joko Atlantikoak antolatzeko lankidetza hitzarmena. Bela, surf, arraunketa, piraguismoa eta urpekaritza erakoak batzen dituen nazioarteko kirol ikuskizun bakarra dira hauek. Bretainian sortu zituzten 1995ean, eta hortxe egingo dira 2007koak, uztaileko hirugarren astean. Jokoetan nazioarteko batzordea osatzen duten herrialdeetako ordezkaritzek parte hartzen dute (9 eskualde eta Europako ardatz atlantikoko 5 herrialdeek) eta gonbidatutako ordezkaritzek. Sortzaileen artean Bretainia bera, Irlanda, Kornualles, Man uhartea, Gales, Asturias, Galizia eta Portugal daude. Euskal Herria nazioarteko batzordeko eskubide osoko kide bihurtu zen 2004an, eta horregatik, antolatzeko eta erabakitzeko ahalmena dauka. Euskal selekzioa da, hain zuzen, azken bi edizioetako txapelduna. Argazkian, euskal ordezkariak aurreko edizio batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun