Gaur hasi da Bilboko Lurralde Auzitegian duela bi urte Aintzane Garai 26 urteko barrikoztarra ustez bortxatu eta hil zuen Mikel H.B. gaztearen kontrako epaiketa eta ostegunera arte luzatuko da. Bikotekide ohiak neskatoa hil zuela aitortu zuen atxiloketa unean, baina gaurko saioan zerikusirik duenik ukatu du, "poliziak bere emaztea auzian nahastearekin mehatxatu zuela" argudiatuz. Hala ere, 2005eko urriaren 14an, Garai desagertu zen egunean, harekin egon zela onartu du ustezko hiltzaileak: "ezkondu zela eta, hortaz, harremana amaitu nahi zuela esateko" geratu zirela esan du. Eztabaida egin zutela eta ostean neskatoak haren autoan alde egin zuela deklaratu du akusatuak. Abokatuak dio gaztea une txarra pairatzen ari zela garai hartan. Antza, lanean arazoak zituen, senideei ezin zien aitortu norekin ezkondu zen (prostituzioan jarduten zen) eta adoptatua zela jakin berri zuen. Egun hartan, kokaina kontsumitu eta alkohola edan zuela ziurtatu du abokatuak. Argazkian, Garairen senideek 2005eko azaroaren 4an emandako prentsaurrekoaren artxiboko irudia, jasotako laguntza eskertuz.
Gaurko saioan Aintzane Garairen senideek ere deklaratu dute. Desagertu zela jakin zuenean, Bakiotik bilatzeko eskatu zien amak seme-alabei, akusatuarekin geratu zelako. Tentsio uneak ere izan dira epaiketan, neskatoaren nebak aurpegira begiratzeko eskatu baitio akusatuari. Fiskaltzak 31 urteko espetxe zigorra, Garairen familiarentzako 80.000 euroko kalte-ordaina eta 40 urte baino gehiagoko urruntze agindua eskatu ditu akusatuarentzat, bortxaketa eta hilketa delituak egotzita. Akusazio partikularrak, hots, Barrikako Udalak, 47 urteko zigor eskaera egin du; baita 800.000 euroko kalte-ordaina ere. Hain zuzen, Jose Maria Ezpeleta alkate barrikoztarra bera izango da epaiketako saio guztietan, "hildako neskatoaren familiari hasieratik eman diogun laguntzarekin jarraitzeko asmoz". Udal agintariak nabarmendu duenez, "ditugun bitarteko guztiak jarri ditugu Garairen senideen eskuetan; justizia egin dadila baino ez dugu espero orain".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun