Anjel Figueroa algortarra apirilaren 20an, ostiralarekin, iritsi zen Kordobako espetxera, Langraitzetik apirilaren 13an irten eta Zaragoza, Valentzia, Alicante, Granada eta Sevillako espetxeetan gaua egin ondoren, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Kordobako espetxean isolamenduan sartu dute. Hala ere, ez da Figueroa azken asteotan kartzelez aldatutako Uribe Kostako preso bakarra: Algortakoa ere den Endika Lejarzegi hilaren 18an iritsi zen Monterrosora (Lugo). Joan zen hilean jakinarazi zioten Alcala Mecon “tratamenduko” arrazoiengatik destinoa aldatu eta Monterrosora eramango zutela, argitu du errepresioaren aurkako erakundeak. Bestalde, Orkatz Gallastegi berangoztarra 7an atera zuten Madriletik eta bost egun beranduago iritsi zen Castellora, bidean hainbat kartzeletan gaua egin ondoren. Azken hau otsailean eraman zuten Madrilera, epaiketa baterako. Aimar Hidalgo (Algorta) eta Gaizka Gañan (Santurtzi) gaztekin batera epaitu zuten eta 7 urte eta 6 hilabeteko espetxe zigorra ezarri zioten bakoitzari. Argazkian, Algortako Amnistia tabernak irudi berria hartu du egunotan. Herriko artista eta pintore Alberto Ceballosek margoztu du.
Familiarrak Figueroarekin izan ziren joan den asteburuan, AAMk adierazitakoaren arabera, eta bidaia gogorra izan dela aipatu zuen algortarrak, “latako sardina” bat bezala sentitzen dela horren ostean. Orain, Gurutzetan artatu duten medikuek maiatzean eta ekainean kontsulta berriak egin beharko dizkiotela eta ordurako berriro Langraitzera ekarri beharko dutela uste dute. Gaixotasun larria du presoak, hori dela eta, 2005eko abenduan ekarri zuten Langraitzera, ebakuntza egitera. 2006ko maiatzaren 9an ebakuntza egin zioten Gurutzetan. Harrez gero, zerbaitetan hobera egin duen arren, arazo mediku larriak ditu oraindik, tratamenduan segitzen du eta hainbat kontsulta egiteko ditu oraindik Gurutzetako ospitalean. Aipatu behar da hainbat astetan bisitarik gabe ere eduki berri dutela hatz markak digitalizatzeari uko egin ziolako.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun