“Proposamen honen arabera, BOEi dagokienez 4 egin beharrean 5 solairu egingo dira etxe bakoitzeko baina HAPOk eragina zuen etxeak lehengoan segituko dute. Gobernu Taldearekin adostutako planteamendu honi bizilagunen %90ak eman dio babesa, eta horrek erakusten du, Iñaki Urkizaren esanetan, "herritarren eta herri administrazioaren artean akordiorik lortu ahal dela”. HAPO behin aldatuta, 6 hilabeteko lana egin ondoren eta epeak betez gero, urte eta erdiren buruan has litezke etxeak egiten.
Joan den ostiraleko udalbatzarrean, Hiri Antolamendurako Plangintza Orokorrean (HAPO) aldaketa zehatza egiten hastea onartu zuten, Zubilletako 36. eremuari dagokionean (OICOSA eta poligono zuriaren artean), Algortan. Horrek 365 etxebizitza altxatzea ahalbidetuko du, eta horietatik 135 babes ofizialekoak izango dira. Hartara, Getxoko Udalak eta Eusko Jaurlaritzak hitzarmena sinatu zuten duela urte eta erdi. Halere, prozesua geldotu egin da “HAPOren diseinua alde horretarako ez baitzen egokiena”, Iñaki Urkiza Etxebizitza eta Hiri Planeamendurako zinegotziaren ustez, eta gainera, “bertan dauden etxeen bi herenak botatzea proposatzen zuenez, kaltetuak izango ziren auzokideek horren aurkakoak ziren”. "Eurekin asko eta asko berba egin eta gero, akordio batera iritsi gara eta bizilagunek beraiek egin dute diseinu proposamen berria (seigarrena) euren etxeak onik ateratzeko, eta era berean, BOE berriak egin ahal izateko", azaldu zuen. Erabakia EAJ, EA eta EB-Berdeak taldeen aldeko bozekin eta PPren eta PSE-EEren abstentzioarekin atera zen aurrera. Argazkian, Santa Anako BOEen eraikuntza lanak, Areetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun