Laugarren urteurrenarekin bat eginez, maiatzaren 2tik 5era bitartean antolatu ditu Luznegra Jardunaldiak izen bereko kolektiboak. Hain zuzen, Leioako Udondo gaztetxea izango dute topaleku azken egunean, hau da, larunbat honetan. Horrenbestez, Bilbo aldetik Uribe Kosta eskualdeko gune autogestionatu horretara igarota, 17:00etan emango diote hasiera egun horretako egitarauari: "Heziketa alternatibak, unibertsitatetik aratago" gaitzat hartuta hitzaldia emango dute, ordu horretan. Baina ez da guztia solasaldia izango, festarako ere aukera egongo da. 20:00etatik aurrera, kontzertua emango dute Karnvapen Attack (Zaragoza), Cordura (Bilbo), Kosetxa Propia (Galdakao) eta Lucha x la Rabia (Kantabria) taldeek -zehazteke oraindik-. Sarrerak 3 eurotan izango dira eta, horrekin batera, Luznegra fanzina oparituko dute. Argazkian, Udondo gaztetxea.
Iralako gazte lokalean hasiko dira gaur Luznegra Jardunaldien laugarren edizioa, Kakitzaten eskutik. Arratsaldeko 7etatik aurrera, gastu militarrei objekzio fiskala egiteari buruzko hitzaldia eskainiko du koordinakunde antimilitaristako kide batek. Biharamunean, berriz, Bilbotik irten gabe, Izarbeltz ateneora egingo dute jauzi jardunaldiek. Bertan, "El camino de Moises" bideo emanaldia (18:30) eta Queer teoria eta sexualitateari buruzko hitzaldia (19:30) izango dira, Queer Ekintza taldearen eskutik. Ostiralean ere Izarbeltz izango dute topaleku Luznegra Jardunaldietara hurbildu nahi diren guztiek. Batzar irekia egin ostean (18:00), “Telefono rojo: Volamos hacia Moscu” filmea eta afari begetarianoaz gozatu (20:30) eta kantautoreen kontzertua ikusentzuteko aukera izango dute guztiek. Entre pitos y flautas eta 2 zurito izango dira taulagainean, 22:30etik aurrera. Sarrera bi eurotan egongo da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun