Segi gazte erakundeak zabaldutako oharra:
Zuena terrorismoa, kapitalistak!
Maiatzaren Lehena kalera atera eta langile borrokaren balio eta beharra aldarrikatuz Euskal Herria aske eta sozialista eraikitzearen alde egiteko data da. Aurten ere euskal langileriak bizi duen prekarietate soziala salatu beharra daukagu. Azpimarratu behar dugu prekarietate soziala pairatzen duen sektorea ez dela soilik bere lan indarra soldataren truke saltze duena, baizik eta gaur egun langabezian egonda, ikasleak izanda... prekarietate sozial hau pairatzen duten gazte guztiak.
Horrela, apirilaren 27, 28 eta maiatzaren 1-ean, gazteok kalera atera behar gara gaur egungo egoera salatuz eta eraldaketa sozial baten aldarria eginez:
Osasun laboralaren egunaren testuinguruan, lan istripuen kontrako erantzunean jauzi berri bat eman behar dugu. Datuek egoeraren larritasuna bere gordintasunean erakusten digute: hiru egunero langile bat erailtzen dute eta patronala nahiz administrazioa eroso bizi dira inolako urratsik eman gabe.
Aski da! Hau aldatu behar dugu! Gazteok ezin gara geldirik egon gure etorkizuna baldintzatzen ari direnen aurrean. Gure bizitza interes ekonomikoen aurrean saltzen ari direnen aurrean. Confebask, Adegi... Miren Azkarate, Ibarretxe, Sanz, (hiru herrialdetako baten bat)... zuena da terrorismoa, kapitalistak!
Horregatik, gaur, LAB sindikatuaren deialdiari erantzunez, lanuzteak burutu ditugu ikastetxeetan eta ehundaka gazte parte hartu dute egondako mobilizazioetan. Aldaketa politikoak aldaketa soziala ekarri behar du eta norabide horretan gazteok asko dugu esateko. Segik independentzia eta sozialismoan oinarritutako proiektu baten alde lan egiten du, proiektu hau delako gazte askeez osaturiko herri aske bat bermatzeko modu bakarra.
Baina hau ez da guztia. Batzuen interesak herriaren interesen gainetik jartzen dituzten horien ahotan gezurra nagusitzen ari da. Zergaitik ez duzue jendarteratzen AHT-k eragingo dituen ondorio ekologiko, ekonomiko eta soziala? Argi dago proiektu suntsitzaile honek interes polítiko eta ekonomiko konkretuei erantzuten diela. Galdetu ahal diozue euskal jendarteari zein garraio mota, lurralde antolaketa edo herri eredu nahi duen? Horregatik, euskal gazteok apirilaren 28an, ere bai, zita bat dugu Bilbon arratsaldeko 17:30tan AHT Gelditu! deituriko manifestazio nazionalean.
Egungo egoera kontutan hartuz, maiatzaren lehena borrokarako eguna izan behar du. Lan indarra kontratazioaren bitartez soldataren truke saltzen duten lan baldintzak salatzeaz aparte, prekarietate soziala pairatzen dugunon egoera kaleratu behar dugu. Egoera hau aldatuko duen eraldaketa soziala bilatu eta borrokatu beharra daukagu. Horretarako indarrak bildu eta egoera honen erantzule diren esplotatzaile eta sasi politikoak kolpatu behar ditugu, eraldaketa politikoa beharrezkoa dugu.
AUTODETERMINAZIOAZ, EUSKAL HERRIA GORRIA!!!
GORA EUSKAL LANGILERIAREN BORROKA!!!
Erandion "indarrean dagoen eredu kapitalista salatzeko" erabili zuen Maiatzaren Lehena bertako Segi gazte erakunde ilegalizatuak. Gazte taldeak hainbat aurrezki kutxa eta banketexeen aurka egin zuen, eta erakunde horietako fatxadetan jarritako kartelen bidez hainbat gaztek pairatzen duen "miseria"ren erantzule izatea leporatu eta, hortaz, terroristatzat jo zituen. Azken egunotan, lan istripuen aurkako zein langileen egunak direla eta, makina bat ekintza egin ditu Segik, besteak beste Leioa eta Erandioko campusean eta Itzubaltzeta / Romon, eta AHT Gelditu! plataforma zein LAB sindikatuaren mobilizazioak babestu ditu, tartean Algortan. Argazkian, Erandioko Segik bidalitako ekimeneko irudia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun