Herritarrei erabaki ahalmena eman eta metro ordutegia zabaltzeko lan egingo du Uribe Kostako EB-Aralarrek
Hauteskunde kanpainan, Uribe Kostako EB-Aralarrek herritarrei parte hartzeko aukera ematearen alde arituko direla adierazi dute gaurko prentsaurrekoan Oskar Matute Ezker Batuko legebiltzarkideak eta Josu Murgia Busturia-Uribe barrutiko Batzar Nagusietarako hautagaiak: era berean metroaren ordutegia zabaltzeko eta maiztasuna gehitzeko konpromisoa dutela adierazi dute. Horrela, koalizioaren hauteskunde programa aurkeztu dute biek, Gorka Urkiza (Plentzia), Koldo Martinez (Berango), Mitxel Mieves (Urduliz), Maria Urbizu (Gorliz) eta Jose Vicente Ojinaga (Sopela) eskualdeko hautagaiak lagun zituztela. EB-Aralarren helburuen artean, “Eusko Jaurlaritzari behar duen lurzorua ematen ahaleginduko gara, babestutako etxebizitzak eta alokairuzko etxeak egiteko, egungo luxuzko eraikinen eta faborezko espekulazioaren aurrean”. Zentzu horretan, Etxebitzak Alokatzeko Laguntza Plana egitearen alde agertu dira, behar gehien dituzten taldeei zuzenduta, eta bereziki, gazteek duten etxebizitza arazoari aurre egiteko.
Herritarrek parte hartzeko aukera izan dezaten, "beharrezkoak diren esparruak" sortzeko lan egingo dutela gaineratu eta azpiegitura, obra publiko eta ongizateari dagokien diru partidetan alde edo kontra bozkatzeko bideak jarriko dituztela adierazi dute. 0 eta 2 urte bitarteko umeentzako haurreskoletako plazak gehitzea eta etxeko laguntza behar dutenei laguntza hori bideratzea dute helburu, baita bazterketa sozialean bizi diren pertsonei zuzendutako laguntzak ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun