Lemoiz eta Sopelakoa izan ezik eskualdeko EAEren zerrenda guztiak inpugnatu dituzte
Eusko Abertzale Ekintzaren (EAE) 110 hautes-zerrenden (pdf) aurka jo du Espainiako Fiskaltzak, haien artean Barrika, Berango, Erandio, Getxo, Leioa eta Urdulizkoak daudela, berria.info-k jakinarazi duenez. Bestalde, Eitb24.com-ek zabaldu duenez, Estatuaren abokatuak haratago joan da eta 122 zerrenda izan ditu jomugan, guztira 133 zerrenda auzian jarriz. Conde-Pumpidok legearen bestaldean jarri dituenaz gain, Gorliz eta Plentzia zein Bizkaiko Batzar Nagusietako Busturia-Uribe barrutirako EAEk aurkeztutako zerrendak inpugnatzea eskatu du Estatuko abokatuak. Guztira, San Andres egunean sortutako alderdiak 256 zerrenda aurkeztu zituen, tartean eskualdeko 9 udalerrietan eta Erandion. Estatuaren abokatuak Bilbo, Donostia eta Gasteizerako, Nafarroako Parlamenturako eta Araba, Bizkaia eta Gipuzkoako Batzar Nagusietarako zerrenda gehien inpugnatu ditu, dozenaka udal zerrenda bezala. Atzo, ASren 246 hautagaitza eta beste 7 zerrenda independienteen aurka egin zuten Fiskaltzak eta Estatuaren abokatuak. Argazkian, Josu Amezaga EAEko zerrendaburua Getxon.
Espainiako Auzitegi Goreneko 61. Aretoak gaur arratsaldean hasi da Fiskaltza eta Estatuko abokatuaren txostenak aztertzen eta dagoeneko inpugnatutako zerrendei ukatu dizkie hautes-erroldako datuak izatea, bertan agertzen diren pertsonen "eskubideak eta bizitza arriskuan ez jartzeko". Aretoak, kaltetutako zerrenden alegazioak ikusi ondoren, ostiralean edo larunbatean esango du jasotako inpugnazioak onartuko dituen, eta igandean eta astelehenean AS, zerrenda independenteak eta EAEk 61. Aretoaren erabakiaren aurkako helegiteak jartzeko aukera izango dute. Ondoren, astearte eta ostegun bitartean (hilak 8tik 10era) Auzitegi Konstituzionalak azken eta behin betiko erabakia hartuko luke.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun