"Asterik aste kontrolak egiten ditu Berangoko Udalak, Sabino Arana kalean dagoen Purgatorio pubak legeak agintzen dituen baldintzak betetzen dituen egiaztatzeko", horrela adierazi du prentsa oharrean Miren Dobaran alkateak, intsonorizazioa eta itxiera ordutegia bete egiten dituela zehaztu aurretik. Gauzak horrela, legediaren arabera jokatzen badute, "ezertxo ere ez" dutela egiterik argitu du udal agintari jelkideak. Astebururo 200 gazte inguru batzen dira Purgatorio inguruetan eta horrek auzotarren kexak eragin eragin ditu: bertan botilioia egin eta droga kontsumitu eta horrekin trafikatzen dela salatzen dute. Argudio berberak erabili zituen Koldo Martinez Ezker Batuko zinegotziak, joan den asteazkeneko udalbatzarrean, aipatu puba itxi dezatela eskatzeko. Ostiral gauean salaketa ere jarri zuen Ertzaintzaren aurrean berak. Hala ere, eskaera "bidegabetzat" jo zuen Dobaranek, droga trafikoa dela eta, "froga sendorik ez" dagoelako. Bitartean, botiloia egiteagatik isunak jartzen hasiko direla iragarri du alkateak. Argazkian, Miren Dobaran Berangoko alkatea.
"Ertzaintzaren eskumena da jende multzo horren handia kontrolatzea", adierazi du Dobaranek. Tokiko agintariaren ustez, udaltzain kopurua handitzeak "ez du arazoa konponduko, horrenbeste lagunei ezin dielako aurre egin patruila bakar batek". Jarraitu duenez, "Beharrezkoa den bezala, bi patruila auto eta furgoi bat eramaten ditu bertara Ertzaintzak, gure esku ez dagoen polizia zabaltzea burutuz". Joan den asteburuan, eremua kontrolatu eta udal arautegiaren araberako lehenengo isunak jarri zituen polizia autonomikoak, tokiko iturrien arabera. Horretaz gain, noizean behin establezimendu barruan izango direla aurreratu du Berangoko Udalak, drogarekin trafikatzen den egiaztatu ahal izateko. Horretaz gain, hilabeteko epea eman diete jabeei larrialdi irteerak hobetzeko. Dobaranek aitortu duenez, "jakin badakigu joan den astean ez zirela ateak itxi eta musika kanpotik entzuten zela eta horrek isuna ekarriko du".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun