Ildo beretik, Arruek "onartezintzat" jo zuen "udaletxetik gurasoak derrigortzea" eta guraso etorkinen euskararen aldeko esperientziak biltzen dituen "Etorkizuna euskaraz dator" liburuxka "guztiok ahaztu ditugun garaiak gogorazten digu" esatera ailegatu zen.
Baina, bere hitzek izango duten interpretazioagatik kezkatuta edo, Getxoko PPren alkategaik ondokoa zehaztu zuen: "gero ez diezagutela esan PPkook ez dugula gure hizkuntza maite. Euskara gure hizkuntza da, kultur ondarea da eta gauza guztien gainetik defendatzen dugu. Baina ez dugu nahi tresna politikoa bihur dezaten". Ondoren, Arruek azaldu zuen euskara defendatzeko PPk duen estrategia: "hautatzeko berdintasuna egotea defendatzen dugu".
Aurreko kanpainak aipagai
Baina, Getxoko PPk ez zuen aurtengo kanpaina kasu isolatutzat gisa jo. Eskumako alderdiaren arabera, Euskara Zerbitzuak "hainbatetan egin du irrist" azken lau urteotan. Bi kasu aipagarrienak jarri zituzten mahai gainean: 2005eko udan "pin batekin Getxoko euskaldunak xakitu nahi zuen kanpaina" eta 2004ko neguan "Habla en cristiano" erakusketako iragarki batean Irlandesas eskolako uniformea jantzita zeraman Afrika Bibang eta Asier Hormaza belauniko agertzea. Azken argazki horrek, Arruerentzat, "A ereduko ikasleak makurtzen zituen".
Hiru kanpainen atzean, popularren iritziz, "A eredua etorkizuneko eredu gisa hautatzen duten getxoztarren kaltean manipulatzen dute hizkuntza".
Getxon eskaintzen diren hezkuntz ereduen inguruko informazioa eta B zein D ereduak bultzatzen dituen "1+1=2" kanpainaren "Etorkizuna euskaraz dator" gurasoentzako liburuxka atzera botatzea eskatu zuen pasa den ostiralean Getxoko PPk, "xenofoboa eta manipulatzailea" delakoan. Marisa Arrue Getxoko PPko presidente eta alkategaiak, martxoaren 9an bukatu zen kanpaina bertan behera utz dezaten eskatzeaz gain, Euskara Zerbitzuak "legealdi osoan zehar" garatu duen politikaren aurkako hitzak izan zituen, baita arloa koordinatzen duen Imanol Landa alkategai jelkidearen aurka ere. Aurrematrikulazio kanpainak seme-alabak "D ereduan ala, gaitzerdi balitz bezala, B ereduan" sar ditzatzen gurasoak bideratzen dituela salatu zuen Arruek. Bere ustez, euskara menperatzeak lana topatzen eta gizarteratzen laguntzen duela ez da egia. Argazkian, Raquel Gonzalez, Marisa Arrue eta Eduardo Andrade zinegotzi popularrak prentsaurrekoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun