Ingurumen gelak 2007-2008ko ikasturte berriarekin batera zabalduko ditu ateak, gehien bat eskolakoei egongo delako bideratuta. Gela Cespa enpresak kudeatuko du. Gaur egun udalerrian kale garbiketaren, sastarrak batzearen eta transfer instalazioaren ustiatze zerbitzuaz arduratzen da. Enpresa honek maila desberdinetako ikasleentzako eta antolatutako taldeentzako eguneroko bisitaldi programa osatuko du, baita gainontzeko herritarrentzat ere. Gela urte osoan egongo da zabalik, jaiegun berezietan izan ezik.
Hiru atal
Hiru sailetan egongo da banatuta ingurumen aretoa. Lehenengoan, Getxo udalerriko biodibertsitatea erakutsiko du, ikuspegi orokorra emanez eta udalerrian diren hiru ekosistemak ardatz nagusi hartuz: landazabal atlantikoa (baserri aldea eta bertako basotxoak) ; kostaldea (Galeako itsaslabarrak, hondartzak eta Portu Zaharra) ; eta Bolueko hezegunea (landareak eta fauna). Gai hauek erreporje moduan eta horma irudi handiekin egongo dira azalduta. Halaber, lorategi botanikoa izango da, Getxo eta inguruko landare eta fauna ezagunenak jasoko dituela.
Bigarren arlo batean, erakusketa izango da laguntza didaktikoa eskaintzeko eta hondakinen arazoa, uraren kudeaketa, energia, aztarna ekologikoa eta Agenda 21 bezalako gaiak aztertzea ahalbidetuko duena. Parte hartzea sustatuko du erakusketak eta dibertigarria izango da aldi berean, eta horretarako informatika programak sortu dituzte olgetan ikasten laguntzeko. Jolas eta eskulanen heziketa tailerra izango du eta baita erakusketa gelatxoa Udalak ingurumenari lotuta bultzaturiko jarduera guztiak jasotzeko.
Jolas gunea da hirugarrena eta herritarren gozamenerako eta aisialdirako ingurua izango da. Umeentzako jokoak, picnic mahaiak, komunak, eta abar edukiko ditu bisitari guztiak elkartzeko eta gozatzeko gunea izango dela.
Garapen iraunkorraren berri emango die eskola umeei Larrañazubiko ingurumen aretoak
Larrañazubiko udal zabortegi zaharrean egokitutako ingurumen aretoak, "Getxoko Udalak herritarren gozamenerako sortutako gunea" osatuko du eta garapen iraunkorra izango du ardatz nagusi. Ingurumen-gune hau egiteak, hortaz, "orain arte udal zabortegia izandakoaren behin betiko zarratzea ekarriko du", Europako ingurumen araudia betez eta Tokiko Agenda 21ean finkatutako helburuei jarraituz, udal arduradunek nabarmendutakoaren arabera. Instalazio berrietan, sastarrak tratatzeko gutea eta garbigunea ere badaude, eta Getxoko Udalaren eta Europako Kohesio Fondoaren arteko lankidetzaren emaitza dira. Azken erakunde horrek instalazioen %80 ordaindu du. Guneak 5.200.000 euro inguruko kostea izan du eta horietatik 1.400.000 euro aretoarentzat izan dira. Ingurumen aretoa, nagusiki, eskola-umeei dago begira, gainontzeko herritarrak ahaztuko ez baditu ere, “eta hauek ingurumen arloko arriskuez informatu eta horiek zelan konpondu ikasi ahal izango dute”, Iñaki Zarraoa alkateak azaldutakoaren arabera. Atzoko aurkezpenean gaineratu zuenez, “bisitariak transfer gunera hurbildu ahal izango dira, hondakinen bilketa selektiboa eta zabortegiaren berreskuratze lanak eta baita lixibatuen gunea ezagutzeko ere”. Bestalde, Agenda 21eko ingurumen foroan parte hartzen duten ikastetxeetako umeek edukiontzi gehiago ipintzea eta informazio eta kontzientziazio gehiago zabaltzea eskatu zieten ostiralean udal agintariei. Argazkian, atzo aurkeztu zuten ingurumen areto berria / Getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun