Egun Txorimalo gaztetxea dagoen etxea okupatzeagatik abiatutako prozesu juridikoa 2006ko otsailean abiatu zen, etxeko jabearen ekimenez. Orduan skuat gisa erabiltzen zuten gazte drogazaleak, baina, alde egin zuten eta 2006ko apirilean Algortako Gazte Asanbladak lekua okupatu eta Txorimalo gaztetxea sortu zuen. Etxean aldaketa horiek eman badira ere, Getxoko 5. Instrukzio Epaitegirako gauzak ez dira aldatu eta gaur goizean gazteei behin eta berriro drogazaleak ote diren, desintoxikazio zentroren batean egon diren edota droga uzteko laguntza profesionala behar duten galdetu diete. Kasu guztietan ezetza izan da erantzuna.
Algortako Gazte Asanbladako kideek auziak hartzen duen norabideari so eta adi egotera deitu dute, bertatik Txorimalo gaztetxearen aurkako desalojo agindua etor daitekeelako. Dena den, berriki Txorimaloko kideek gogoratu bezala auzi hau ez da "irekita dagoen epaiketa bakarra", izan ere, Algortako Mentxakabarriren inguruan sei gazte daude auziperatuta, haietako batzuk milaka euroko fidantza ordaindu behar izan dutenak eta Espainiako Auzitegi Nazionalean epaituak izateko arriskuan egon zirenak, horretarako bidea Txorimaloko ustezko kideek izango duten epaile berak eman zuela. Era berean, Burdinola gaztetxeagatik pertsona bat dago epaiketaren zain.
Txorimalo gaztetxeko kideak direlakoan, Pinueta, Algorta eta Getxoko gazte bana deklaratu dute gaur eguerdian Getxoko 5. Instrukzio Epaitegian ondasun higiezinen usurpazio delitu baten ustezko egile gisa. Epailea kanpoan zela, epaitegiko idazkariaren aurrean euskaraz ukatu dituzte salaketak, itzultzaile batek haien hitzak Justizia Administrazioak ofizialtzat hartzen duen hizkuntza bakarrera, gaztelera, bihurtu dituela. Hiru gazteen abokatuak nabarmendu duenez, gaurkoa "funtsik gabeko prozedura da". Izan ere, ertzainek aitortu zutenez, auziperatu guztiak etxetik kanpo ohartarazi zituzten eta hiru gazteak beren kabuz komisaldegira joan zirenean ohartarazpenen zergatia galdetzera "orduan hartu zizkieten datuak". Orain dela egun batzuk deklaratu zuen laugarren gaztearen ofiziozko abokatuak egin bezala, hiru gazteen defentsak kasua artxibatzea eskatuko du. Bestalde, Txorimalo gaztetxeak aurretik epaitegi aurrean kontzentrazioa deitu bazuen ere, atzo egindako asanbladan bertan behera utzi zuten protesta hori. Aldiz, epaitegi barruan zein kanpoan dozena bat ertzain izan dira balizko kontzentrazioaren zain. Era berean, auziperatuen eta haiei elkartasuna adieraztera etorritakoen motorren eta autoen matrikulak hartu dituzte. Argazkian, Txorimalo gaztetxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun