Medikuntza eta Zientzi Historiaren Euskal Museoaren 25. urteurrenaren ospakizuna izango da bihar Leioako campusean
Euskal Herriko Unibertsitateko (EHU) Erandio eta Leioako campuseko Medikuntza eta Zientzi Historiaren Euskal Museoaren 25. urteurrena ospatzeko ekitaldia egingo da larunbat honetan museoaren mintegi aretoan, 11:00etan hasita, unibertsitateko iturriek gaur iragarri dutenez. Ekitaldia, Societe Française dHistoire de la Medicine elkarteak antolatutako Journees Transpyreneennes d"Histoire de la Medicine-rekin batera ospatuko da. Jardunaldiak bihartik igandera bitartean izango dira Hendaian, eta EHUko Medikuntzaren Historiaren Euskal Museoan. Biharko ekitaldian egongo dira Juan Ignacio Perez EHUko errektorea, Anton Erkoreka Medikuntza eta Zientzi Historiaren Euskal Museoko zuzendaria eta Maria Angeles Larrea museoaren sortzaile Jose Luis Goti zenaren alarguna. Argazkian, museoan dagoen, Bilboko Udal Laborategiko antzinako bulegoa / EHU.
"Jose Luis Goti" Medikuntza eta Zientzi Historiaren Museoak 1974an ekin zion bere ibilbideari, Bilboko Zientzia Medikoen Akademian, mediku eta akademiko batzuek ekarritako lehenengo gauzak jaso zirenean. 1979an ireki zuen lehenengo aretoa, Leioako campuseko Medikuntza Fakultatean, eta inaugurazio ofiziala 1982ko maiatzaren 25ean egin zen. Estatu osoko unibertsitate batean ere ez dago publikoari irekita dagoen honelako museo bat. Medikuntza Historiaren Museotzat dago pentsatuta, baina baita Teknologia eta Natur Zientzien Museotzat ere. Hartzen duen azalera 1.520 metro koadrokoa da, 23 aretotan banatuta; lau areto Medikuntza Fakultatean daude, eta gainontzeko 19ak Biblioteken eraikin nagusian. Ondarea, 5.000 objektuk eta Euskal Herri guztiko mediku, senide, instituzio eta erakunde publiko eta pribatuen emaitzetatiko balio historiko-medikodun 6.000 liburuk osatzen dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun