Pasa den ostiral gauean zehar, hainbat ezezagunek pintaketak egin dituzte EAJ, EA, EB eta Aralar alderdiek Algortan dituzten egoitza politikoetan. Algortako batzokian, ostiral gauean gertatu zen erasoa eta, besteak beste Imanol Landa alkategai jelkidearen irudia duen panela (argazkian) zikindu zuten margo gorri eta horia erabiliz. Landak arbuiatu ditu "batzuek nazio eraikuntzatzat jotzen duten" hori bezalako ekimenak eta maiatzaren 27an "erantzun positiboa" ematera deitu du. Algortako alkartetxearen kasuan, ezezagunek pertsianak apurtu egin zituztela salatu zuen Unai Ziarreta alderdiaren idazkari nagusiak. Era berean, "Konponbiderik gabe, bakerik ez!" bezalako pintaketak egin zituzten lokaleko fatxadan.
Gau berean ere izan zen Aralar eta Ezker Batuaren egoitzen aurkako erasoa. Ezezagunek "putreak", "lapurrak", “Akordiorik gabe, bakerik ez” eta “Hauteskunde antidemokratikoak” moduko hitzak margotu dituzte. Koalizioan doazen bi alderdiek aipatu erasoa salatu dute “askatasun ideologikoaren, aniztasunaren eta adierazpen askatasunaren” kontrako ekintza dela esanez, eta normalizazio politikoaren bidean "beste oztopo bat gehiago" dela adierazi dute. Bi alderdietako ordezkariek galdera egin diete pintaden egileei ia hori den defendatzen duten demokrazia, eraikuntza nazionala horrela egin nahi duten eta horixe duten beste alderdiei elkarrizketa eta akordioak eskatzeko modua. EBk eta Aralarrek gogoratu dute biek ala biek Alderdiaren Legearen aurka daudela eta arau hori "bertan behera uzteko lanean" dihardutela. Gaineratu dutenez, Sozialista Abertzaleen zerrendak osatzeko 83.501 sinaduren artean, hainbat izan dira bi alderdi horien kideena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun